Batumelebi | ბათუმში კორონავირუსი კიდევ ორ პირს დაუდასტურდა, ერთ-ერთის მდგომარეობა მძიმეა ბათუმში კორონავირუსი კიდევ ორ პირს დაუდასტურდა, ერთ-ერთის მდგომარეობა მძიმეა – Batumelebi
RU | GE  

ბათუმში კორონავირუსი კიდევ ორ პირს დაუდასტურდა, ერთ-ერთის მდგომარეობა მძიმეა

ბათუმში კორონავირუსი კიდევ ორ პირს დაუდასტურდა, მათ შორის, ერთ-ერთის მდგომარეობა მძიმეა. მას ორმხრივი პნევმონია აქვს და შესაბამის მკურნალობის კურსს გადის.

ბათუმის რესპუბლიკური საავადმყოფოს კლინიკური მენეჯერის, გია კიკაბიძის თქმით, ორივე მამაკაცი, რომლებსაც დღეს covid19 დაუდასტურდა, აქამდე საკარანტინო სივრცეში იყო მოთავსებული, ისინი საშუალო ასაკის საქართველოს მოქალაქეები არიან.

„მათ შორის, ერთ-ერთი უკვე მე-13 დღეა იყო კარანტინში, უკვე გაშვებას აპირებდნენ და დაუდასტურდა კორონავირუსი… ორივე მათგანი ყაზახეთიდან არის შემოსული, იქ მუშაობდნენ,“ – გვითხრა გია კიკაბიძემ.

ბათუმის რესპუბლიკური საავადმყოფოს კოვიდცენტრში ამ დრომდე 10 პაციენტი მკურნალობდა. დღეს, 26 ივლისს ეს მაჩვენებელი 14-მდე გაიზარდა – ბათუმში კიდევ ორ პაციენტი მცხეთიდან გადმოიყვანეს.

„მათ ადრე დაუდასტურდათ კორონავირუსი, რადგან ბათუმელები არიან, ითხოვეს ბათუმში გადმოყვანა და ჩვენთან მოვათავსეთ, მათი ჯანმრთელობის მდგომარეობაც სტაბილურია,“ – დასძინა „ბათუმელებთან“ ბათუმის რესპუბლიკური საავადმყოფოს კლინიკურმა მენეჯერმა, გია კიკაბიძემ.

სამთავრობო ვებსაიტ stopcov.ge-ს ინფორმაციით, 26 ივლისის 11 საათის მონაცემებით, საქართველოში კორონავირუსის 1 131 შემთხვევაა დაფიქსირებული. ბოლო 24 საათში შემთხვევევბის რაოდენობა 14-ით არის გაზრდილი. ამავე პერიოდში გამოჯანმრთელდა 3 ადამიანი.

დღევანდელი მონაცემებით, გამოჯანმრთელებულია 920 პაციენტი, ხოლო გარდაცვლილია – 16. საკარანტინო სივრცეებში 6 ათასზე მეტი ადამიანია მოთავსებული, სტაციონარში მეთვალყურეობის ქვეშ – 302.

 

ნეტგაზეთის მასალების სხვა გამოცემებში გადაბეჭდვის წესი
ავტორი