ნეტგაზეთი • RU

2000-ზე მეტი ოჯახი აჭარაში ბინის მიღებას სახელმწიფოს დახმარებით ცდილობს

მონაცემთა ბაზის მიხედვით, რომელიც სამთავრობო კომისიამ შეადგინა ე.წ. ოცნების ქალაქში დაპირებულ ბინას 1607 ოჯახი ელოდება. სამთავრობო კომისიამ მუშაობა დაასრულა და მონაცემების გაფილტვრა დაიწყო. ეს იმას ნიშნავს, რომ მთავრობა შეისწავლის ამ ოჯახებიდან რომელიმეს ხომ არ აქვს ინდივიდუალური საკუთრება, თუ დახმარება რეალურად სჭირდება.

კომისიის თავმჯდომარის, რამაზ ჯინჭარაძის ინფორმაციით [რამაზ ჯინჭარაძე აჭარის ჯანდაცვის მინისტრის მოადგილეა], ამ პროცესში საერთაშორისო ორგანიზაცია „იუნისეფი“ ჩაერთვება: „და პროცესი მაქსიმალურად გამჭვირვალე იქნება“.

აღწერის მონაცემების მიხედვით, კომისიამ „ოცნების ქალაქში“ 64 საცხოვრებლის მესაკუთრის იდენტიფიცირება ვერ მოახერხა, რადგან ქოხები დაკეტილია და მესაკუთრე ადგილზე არ გამოჩენილა: „საუბარია ოჯახებზე, ვინც დაკეტა სახლი და სხვაგან გადავიდა“.

რამაზ ჯინჭარაძის ინფორმაციით, უკვე გამოავლინეს შემთხვევები, როცა მონაცემთა ბაზაში დედა და შვილები, ცოლი და ქმარ-შვილი ან პირიქით ცალ-ცალკე დარეგისტრირდნენ. კომისიამ ასეთი 55 ოჯახი გამოავლინა: „მათთან შეთანხმებით სარეგისტრაციო ბაზაში ეს ოჯახები გავაერთიანეთ.“

ე.წ. „ოცნების ქალაქი“ ბათუმთან ახლოს, ხელვაჩაურში, ყოფილი სამხედრო ბატალიონის ტერიტორიაზე 2012 წელს, საპარლამენტო არჩევნების შემდეგ გაჩნდა. ყოფილი 25-ე და 53-ე სამხედრო ბატალიონების ბაზების ტერიტორიაზე ოჯახებმა, რომელთა ნაწილი აცხადებდა, რომ ეკომიგრანტები იყვნენ ან არ გააჩნდათ საცხოვრებელი, ხის ფიცრულები ააგეს და დასახლდნენ, თუმცა, თანდათან ხის ნაგებობებს კაპიტალური შენობები ჩაენაცვლა.

ტერიტორია, სადაც „ოცნების ქალაქია“ გაშენებული, აჭარის ავტონომიური რესპუბლიკის საკუთრებაა.

„ოცნების ქალაქში“ მცხოვრები ოჯახების რეგისტრაცია 2019 წლის 9 თებერვალს დაიწყო.

რაც შეეხება „იაფი სახლის“ პროგრამას, ბათუმის მერიის ინფორმაციით, ე.წ. იაფი სახლის პროგრამაში ამ დროისთვის 90 განაცხადია დარეგისტრირებული. ამ განცხადებებს სპეციალური კომისია უახლოეს მომავალში შეისწავლის. თუმცა, 2020 წლის 11 მარტის მდგომარეობით, ბათუმის მერიაში აცხადებდნენ, რომ სერვისცენტრებს „იაფ სახლში“ ბინის მისაღებად 560-მა მოქალაქემ მიმართა.

ბევრად უფრო ადრე, როდესაც იაფი სახლი პროგრამის იდეა გაჩნდა ბათუმის მერიაში, 2013 წლის იანვრიდან ნოემბრის ჩათვლით პერიოდში, იაფ სახლში ბინის მისაღებად ბათუმის მერიას 4 567-მა პირმა მიმართა განცხადებით.

„იაფ სახლში“ ჩასართველად აუცილებელი მოთხოვნაა, მერიის მიერ შემუშავებული კრიტერიუმების დაკმაყოფილება. ამ პროგრამის ფარგლებში ოჯახებს, რომლებიც წინასწარ დამტკიცებულ კრიტერიუმებს დააკმაყოფილებენ, მერია ხელმისაწვდომი საცხოვრისით უზრუნველყოფს.

პროგრამა ბინების გადაცემას 15 წლის ვადით, გამოსყიდვის უფლებას ითვალისწინებს. გამოსყიდვის ფასი კი გადაცემული ფართობის თვითღირებულება იქნება.

„იაფი სახლის“ პროექტის ფარგლებში ბათუმის მერიამ ორი ხუთსართულიანი კორპუსი უკვე ააშენა. ორივე სახლში 20-20 ბინაა. კორპუსების აშენებაზე 2,3 მილიონზე მეტი ლარი დაიხარჯა. „იაფი სახლის“ ფარგლებში კიდევ ორი კორპუსის აშენება იგეგმება.

____

ამავე თემაზე:

ბათუმის მერიისგან ბინას 4567 ოჯახი ითხოვს

ნეტგაზეთის მასალების სხვა გამოცემებში გადაბეჭდვის წესი
ავტორი