არქტიკაში ყინულის საფარის დნობასთან ერთად თეთრი დათვები შესაძლოა მიმდინარე ასწლეულის ბოლოს გადაშენდნენ.
თეთრი დათვები დღეს უკვე შიმშილობენ, რადგან მათი ბუნებრივი საცხოვრებელი გარემო ნადგურდება. მეცნიერების გათვლებით, თუ ნახშირორჟანგის ემისია შენარჩუნდება დღევანდელ ნიშნულზე, გლობალური დათბობა თეთრი დათვების პოპულაციის განადგურებას გამოიწვევს.
არქტიკაში კლიმატი ორჯერ უფრო სწრაფად იცვლება პლანეტის სხვა რეგიონებთან შედარებით. პოლარულ დათვებს შეუძლიათ დაახლოებით 200 დღე გაძლონ კვების გარეშე, მაგრამ მათ სულ უფრო მეტად უჭირთ საკვების მოპოვება.
პოლარული დათვები ნადირობენ არქტიკულ სელაპებზე, რომლებიც ყინულზე ბინადრობენ. თუ თეთრი დათვის სხეულის მასა 20 პროცენტით ნაკლებია ნორმაზე, 200 დღის ნაცვლად მას 125 დღე შეუძლია იცოცხლოს საკვების გარეშე.
