თურქეთში დასაქმებული ქალები დავით გაბაიძესთან შეხვედრას ითხოვენ – აქცია ბათუმში [LIVE]

დღეს, 8 ივლისს, ბათუმში, აჭარის უმაღლეს საბჭოსთან თურქეთში დასაქმებული ქალები შეიკრიბნენ. ისინი აჭარის უმაღლესი საბჭოს თავმჯდომარესთან, დავით გაბაიძესთან შეხვედრას ითხოვენ.

თურქეთში დასაქმებული ქალები აჭარაში უკვე მეხუთედ ითხოვენ თურქეთთან საზღვრის გახსნას ან კომპენსაციას მთავრობისგან. ისინი აცხადებენ, რომ მარტის შემდეგ შემოსავლების გარეშე დარჩნენ, მთავრობა კი მათ პრობლემებს ვერ ხედავს.

თურქეთში დასაქმებული მოქალაქეების ბათუმში გამართული აქციების შემდეგ, საქართველოს მთავრობამ მიიღო გადაწყვეტილება, საზღვარგარეთ თვითდასაქმებულ მოქალაქეებზე გასცეს 300-ლარიანი კომპენსაცია, თუმცა დღეს აქციაზე რამდენიმე ქალმა განაცხადა, რომ ისინი, მართალია, დარეგისტრირდნენ კომპენსაციის მისაღებად, მაგრამ თანხა ჯერ არ მიუღიათ. ასევე, ქალები მიიჩნევენ, რომ ერთჯერადი კომპენსაცია საკმარისი არ არის, რადგან ისინი თვეებია ვერ მუშაობენ და ვერც მთავრობისგან იღებენ პასუხს, როდის გაიხსნება საზღვარი, რომ თურქეთში მუშაობა შეძლონ.

დღეს აქციის მონაწილეებს შეხვდა აჭარის უმაღლესი საბჭოს დამოუკიდებელი დეპუტატი მერაბ ბლადაძე. მან განაცხადა, რომ ეთანხმება აქციის მონაწილეების მოთხოვნას იმის შესახებ, რომ დახმარება ყოველთვიური უნდა იყოს. ასევე, მერაბ ბლადაძის თქმით, აჭარის უმაღლესი საბჭოს თავმჯდომარე დავით გაბაიძე ამჟამად აჭარის მთავრობის თავმჯდომარესთან, თორნიკე რიჟვაძესთან შეხვედრაზე იმყოფება.

აქციაზე ითქვა, რომ აქციის მონაწილეებთან შესახვედრად მზადაა აჭარის უმაღლესი საბჭოს დეპუტატი ლადო მგალობლიშვილი, თუმცა მას აქციის მონაწილეებთან შეხვედრა ჟურნალისტების გარეშე სურს.

აქცია აჭარის უმაღლეს საბჭოსთან ამ წუთებშიც [14:25 სთ.] გრძელდება.