Batumelebi | „მშიერი მოქალაქეები, პირდაპირი მნიშვნელობით, საქართველოში არ არიან“ – ინტერვიუ დეპუტატთან „მშიერი მოქალაქეები, პირდაპირი მნიშვნელობით, საქართველოში არ არიან“ – ინტერვიუ დეპუტატთან – Batumelebi

„მშიერი მოქალაქეები, პირდაპირი მნიშვნელობით, საქართველოში არ არიან“ – ინტერვიუ დეპუტატთან

რატომ არ გაასამართლეს ბათუმის ციხის ყოფილი უფროსები, რომლებსაც ბრალი 6 წლის წინ წარუდგინეს და ვის უნდა მოსთხოვონ პასუხი ყოფილმა პატიმრებმა, რომლებსაც ციხეებში აწამებდნენ? – ინტერვიუ ლადო მგალობლიშვილთან ამ თემაზე საუბრით დავიწყეთ, რადგან ახლახან, ერთ-ერთ სატელევიზიო ინტერვიუს დროს მან წინა ხელისუფლების დროინდელი ბათუმის ციხე მეორე მსოფლიო ომის დროინდელ საკონცენტრაციო ბანაკებს შეადარა. აღმოჩნდა, რომ დეპუტატს ინფორმაციაც კი არ აქვს, ციხის ყოფილი უფროსები  ჯერ კიდევ რომ არ გაუსამართლებიათ.

ლადო მგალობლიშვილი აჭარის უმაღლესი საბჭოს წევრია და „ქართულ ოცნებას“ წარმოადგენს. იგი ამბობს, რომ მისი გააქტიურება ტელევიზიებსა თუ ფეისბუქში არ უკავშირდება მისი მხრიდან პარლამენტში გადასვლის მცდელობას. დეპუტატი ირწმუნება, რომ კონსულტაციები ჯერ ამ საკითხზე არ დაწყებულა და ფეისბუქაქტივობებსაც საკუთარი ჯიბიდან აფინანსებს.

უმაღლესი საბჭოს დეპუტატს „ბათუმელები“ რამდენიმე პრობლემაზე ესაუბრა.

  • ბატონო ლადო, თქვენ წინა ხელისუფლების დროინდელი ბათუმის ციხე შეადარეთ ნაცისტურ საკონცენტრაციო ბანაკებს. თუ იცით, რა სამართლებრივი პასუხისმგებლობა დაეკისრათ ბათუმის ციხის იმდროინდელ უფროსებს?

მე რა ინფორმაციაც მაქვს, ბათუმის ციხის ხელმძღვანელობა – ზაზა ჯიქია და გიორგი ვეკუა მიეცა პასუხისგებაში. მერე როგორ განვითარდა მოვლენები, არ ვიცი. ბრალი რომ წაუყენეს, ეგ ვიცი ნამდვილად. არ ვიცი, ალბათ მისცემდნენ სასჯელს, ბრალი რადგან წაუყენეს.

  • 2014 წლიდან მიმდინარეობს ამ საქმეზე სასამართლო პროცესი და იმდენად იშვითად იმართება პროცესები, რომ მოწმეების ნახევარიც კი ჯერ დაკითხული არ არის. 

ესე იგი, სასამართლო სხდომები მიმდინარეობს. მთავარია, რომ ადამიანები, რომლებიც მონაწილეობდნენ წამებასა და არაადამიანურ მოპყრობაში, უნდა იყვნენ დასჯილები… ეს მეტყველებს იმაზე, რომ სასამართლო გადატვირთულია და არ ეცალა. მთავარია, რომ ბრალი წაუყენეს, სასამართლო განხილვა მიმდინარეობს, რა თქმა უნდა, უფრო მალე რომ დასრულებულიყო ეს სხდომა, უკეთესი იქნებოდა, ამაზე არ ვდავობთ.

  • მოქალაქეებს ხომ აქვთ ეფექტური მართლმსაჯულების უფლება. არ ხედავთ ხელისუფლების პასუხისმგებლობის საკითხს და იგივე სასამართლო კლანის მუშაობის შედეგს, რაშიც თქვენ გადანაშაულებენ? 

სასამართლო არ არის პოლიტიკური ხელისუფლების შემადგენელი ნაწილი და მე პასუხს, როგორც მმართველი პარტიის წარმომადგენელი, არ ვაგებ. ეს არის ხელისუფლების სხვა შტო… სასამართლოსთან დაკავშირებით რაც შემიძლია გითხრათ, არის ის, რომ გამამართლებელი განაჩენები ხშირად დგება, ადმინისტრაციულ დავებს იგებენ მოქალაქეები. რა თქმა უნდა, არის ხარვეზები, მაგალითად, სასამართლოების გადატვირთულობა. სწრაფი მართლმსაჯულების ვერგანხორციელება არის გამოწვევა. ჩემი მოკრძალებული აზრით, სასამართლო ხელისუფლებამ ამ საკითხზე უნდა იმუშაოს. სასამართლო ხელისუფლებაში პოლიტიკური ხელისუფლება არ ერევა.

  • თქვენს გააქტიურებაზე მინდა გკითხოთ: იქნებით საპარლამენტო სიაში, თუ ისევ უმაღლესი საბჭოს დეპუტატობას აპირებთ? ასევე საინტერესოა, საიდან ფინანსდება თქვენი აქტივობები, მაგალითად, სოციალურ ქსელში? 

მე ამ საკითხს ვუყურებ ასე: თუ ჩვენი პოლიტიკური გუნდი ჩათვლის, რომ პარლამენტში, ან უმაღლესში ჩემი ყოფნა იქნება საჭირო, მე ამ შემოთავაზებას, რა თქმა უნდა, მივიღებ. ამასთან დაკავშირებით რაიმე კონკრეტული კონსულტაცია ჯერ არ მქონია… ეს ოთხი წელი ისედაც ხშირად ვმონაწილეობდი სატელევიზო გადაცემებში, ამას წინათ ანგარიში გავაკეთე, რადგან, ფაქტობრივად, ამოგვეწურა 4 წელი, მე ამომრჩევლის წინაშე გავაკეთე ანგარიში. ხარჯებს რაც შეეხება, ეს გაღებულია ჩემგან, პირადად ჩემი რესურსებია ყველაფერი. ეს ვიდეოც პირადი რესურსებით მომზადდა. კომიტეტის ანგარიში რადგან არის, შეგვეძლო ბიუჯეტის ხარჯითაც მოგვემზადებია, მაგრამ ასე ვარჩიე მაინც.

  • ამომრჩევლის წინაშე ანგარიშვალდებულებაზე როცა საუბრობთ, თურქეთში დასაქმებული და ახლა უმუშევრად დარჩენილი ადამიანების პრობლემა ხომ არ აჩვენებს, რომ ამ ადამიანებთან მინიმუმ კომუნიკაცია არ გქონიათ? 

ამას წინათ ჯანდაცვის მინისტრთან ერთად შევხდით ამ მოქალაქეებს და დავპირდით, რომ საკითხს ცენტრალურ ხელისუფლებასთან დავაყენებდით. ეს საკითხი გადაწყვეტილია. მანდ აღრიცხვა არ არის საჭირო. საჭიროა, რომ ამათ წარადგინონ ცნობები საზღვრის კვეთის შესახებ და ავტომატურად მიიღებენ თანხებს. ეს საკითხი მოგვარებულია ზუსტად ამ კომუნიკაციის შედეგად.

  • მოგვარებულად რას მიიჩნევთ, რომ თითქმის ოთხი თვის უმუშევრობის პირობებში 300 ლარს მიიღებენ ეს ადამიანები? თქვენ პირადად რამდენ ხანს გყოფნით 300 ლარი?

ეს ხალხი ითხოვდა ერთჯერადი კომპენსაციის მიღებას, ეს იყო მათი მოთხოვნა და ჩვენ ეს მოთხოვნა შევასრულეთ. ახლა 300 ლარი კი არა, შესაძლოა, 1000 ლარიც არ ეყოს. არ ვამბობ, რომ 300 ლარი საკმარისია და თვეების განმავლობაში იცხოვრებს, მაგრამ რა შესაძლებლობაც იყო, ის გაკეთდა, ისედაც არის სხვა დახმარებები სოციალურად დაუცველებისთვის.

  • ეს ადამიანები  არა მხოლოდ 300 ლარს, არამედ მინიმალურ საარსებო გარემოს ითხოვენ, რაც კონსტიტუციით გარანტირებულია; იმას, რომ მინიმუმ არ უნდა შიოდეთ. 

ეს ადამიანები ითხოვდნენ კომპენსაციას და ამ კომპენსაციას ისინი მიიღებენ. ამ პრობლემის მოგვარებაზე ვსაუბრობ, თორემ, გასაგებია, რომ 300 ლარი არ ეყოფათ… რაც შეუძლია ხელისუფლებას მწირი საბიუჯეტო რესურსებით, დახმარებებს ნამდვილად გავცემთ, მაგრამ რესურსი არის შეზღუდული. თქვენ იცით, რომ კლება გვაქვს ბიუჯეტში.

  • რატომ არ დაითვალეთ მინიმუმ ეს ადამიანები ამ დრომდე, რომ შემდეგ შესაბამისი ნაბიჯი გადაედგა ხელისუფლებას? 

ძალიან მალე გვეცოდინება, ატვირთავენ სისტემაში თავიანთ მონაცემებს და გვეცოდინება.

  • აქამდე ამის საჭიროება რატომ ვერ დაინახეთ? ახალი ამბავი ხომ არაა, რომ ასობით ადამიანი მიდის თურქეთში სამუშაოდ სეზონურად ან ყოველდღიურად გადადის და საღამოს უკან ბრუნდება? 

აქამდე ამას აკეთებდა საქსტატი… მას აქვს ინფორმაცია, ზოგადად, საქართველოში თვითდასაქმებული ადამიანების შესახებ. ეს ხალხი შედის თვითდასაქმებულებში. როგორც ვიცი, საქსტატს ზოგადად ამ ხალხის შესახებ აქვს ინფორმაცია: რამდენი ადამიანი გადადის და ასე შემდეგ. მე ახლა კონკრეტიკაში ვერ შევალ. სავარაუდოდ ესენი უნდა ითვლებოდნენ თვითდასაქმებულებში…

უშუალოდ აჭარიდან რამდენი გადადის, ამის დადგენა შეუძლებელია იმიტომ, რომ ადამიანი ერთ სეზონზე წავა ჩაის საკრეფად, მეორე სეზონზე არ მიდის და ამის დადგენა 100 პროცენტით შეუძლებელია. ჩვენ მათი საჭიროებები ისედაც ვიცით. ვინმემ რომ გვითხრას ქვეყანაში, პირობითად, რამდენია დასაქმებული, რამდენი დაუსაქმებელი და რამდენი თვითდასაქმებული, ეს რაოდენობა საქსტატის მიერ ითვლება და ეს ინფორმაცია ჩვენ ვიცით… ადამიანი სამუშაოს თურქეთში პოულობს, თუ საქართველოში, ამის ცოდნა არაფერს იძლევა.

  • არც ისაა თქვენი პასუხისმგებლობა, რომ უმუშევრობის მაჩვენებელი ქვეყანაში იზრდება? 

უმუშევრობის მაჩვენებელი არ იზრდებოდა, პირიქით, კლება მიმდინარეობდა. უბრალოდ, ამ კოვიდმა არამხოლოდ საქართველოში, სამუშაო ადგილების შემცირება მთელ მსოფლიოში გამოიწვია. სიღარიბის  მიმართულებითაც ჩვენ კლება გვქონდა, მაგრამ მე არ ვიცი მსოფლიოში ქვეყანა, სადაც სიღარიბე და უმუშევრობა პრობლემა არ იყოს.

  • ჩვენ ვწერდით 80 წლის აიშე შაინიძეზე, რომელიც ასევე სარფის საბაჟოსთან იდგა საპროტესტო აქციაზე. ისიც ითხოვს საზღვრის გახსნას, რადგან მის ობოლ შვილიშვილებს შიათ. ეს გამოხატავს თუ არა თქვენი ხელისუფლების სოციალურ პოლიტიკას? 

ჩვენი სოციალური პოლიტიკა არის ის, რომ 70 წელზე მეტი ასაკის ადამიანებს მოვუმატეთ პენსია. ასევე მომავალი წლიდან მათ მოემატებათ პენსია იმის მიხედვით, თუ რამდენი იქნება ინფლაცია. შესაბამისად, სახელმწიფო მაქსიმალურად ცდილობს, რომ პენსიონერს მისცეს პენსია.

  • ეს საკმარისი რომ იყოს, აიშე შაინიძე სარფის საზღვართან არ დადგებოდა აქციაზე. 

მესმის, რომ ბევრი ადამიანი არის რთულ მდგომარეობაში და ითხოვს საზღვრის გახსნას, მაგრამ ჩვენ იქედან სხვა რისკები გვაქვს, არის პანდემიის სერიოზული რისკი.

  • ეს ვიცით. 80 წლის ქალს დასაქმება მიზანმიმართულად თურქეთში კი არ სურს, არამედ ამ ქვეყანაში ვერ პოულობს არსებობის პირობას. 

სახელმწიფო მინიმალურ დონეზე, იმ დონეზე ეხმარება ჩვენს მოქალაქეებს, რომ მშიერი, როგორც ასეთი, პირდაპირი მნიშვნელობით, მოქალაქეები არ არიან საქართველოში. მინიმალურ დონეზე ადამიანს საარსებო რაც სჭირდება, ამას სახელმწიფო ეხმარება ჩვენს მოქალაქეებს.

  • მაშინ რის გამო დგას საბაჟოსთან 80 წლის აიშე შაინიძე? 

სად პენსია რომ აქვს ადამიანს შემოსავალი და სად – დამატებითი შემოსავლები. მეტი შემოსავალი ადამიანს ყოველთვის ურჩევნია ნაკლებს. მას უნდა მეტი შემოსავალი ჰქონდეს.

  • არ გიპასუხიათ – 300 ლარი თქვენ რამდენ ხანს გყოფნით? 

მე 300 ლარი? ეს როგორი შეკითხვაა იცით? ეს მთლად შინაარსს არ გამოხატავს. შესაძლოა, ადამიანმა 300 ლარი იმყოფინოს. არის ხალხი 400 ჰყოფნის, 500 ლარი ჰყოფნის. ეს ძალიან ისეთი ისაა, რა ჰქვია, პირობითი და შედარებითია ყველაფერი.

  • რატომ არ გსურთ მოქალაქეების მიღება უმაღლესი საბჭოს სხდომათა დარბაზში? ისე მოაწყვეთ ახალი დარბაზი, რომ იქ მოქალაქეებისთვის ადგილი არ არის. არადა, საბჭოს სხდომები საჯაროა. 

ვერ დამისახელებთ მსოფლიოში რომელიმე პარლამენტს, სადაც დეპუტატის გარდა, ვინმე სხდომაზე შედიოდეს. უმაღლესი საბჭოც არის საკანონდებლო ორგანო, ასეთი პრეცედენტი მსოფლიოში არ არსებობს, რომ შედიოდეს მოქალაქე და იქ გამოდიოდეს სიტყვით.

  • სიტყვით არ გამოდიან, მაგრამ მოქალაქეებისთვის განკუთვნილი ადგილები მე, პირადად, მინახავს ევროპის რამდენიმე ქვეყნის საკანონმდებლო ორგანოში. 

საქართველოს პარლამენტში ხშირად ვარ მომხსენებელი და მომხსენებლის ფლიგელს იქით გადასვლის უფლება არ მაქვს. საქართველოს პარლამენტში და სხვა ქვეყნების პარლამენტში სხდომებზე შესვლის უფლება არ გააჩნიათ მოქალაქეებს: მოქალაქე ირჩევს დეპუტატს და ის დეპუტატი წარმოადგენს შემდეგ მოქალაქეს.

  • თქვენ პოსტ TV-ის ეთერში ისაუბრეთ აჭარის ტელევიზიიდან ჩამოშორებულ ჟურნალისტებზე. ერთ-ერთ მათგანზე, შორენა ღლონტზე გადაცემის წამყვანმა თქვენ მიერ მიწოდებული ინფორმაციის შემდეგ თქვა, რომ „ის დასაჭერია“. თქვენ არ გაემიჯნეთ ამ შეფასებას, ანუ თქვენც ფიქრობთ, რომ დასაჭერია? თქვენი აზრით, აჭარის ტელევიზიის რამდენი ჟურნალისტია კიდევ დასაჭერი? 

მე არასოდეს არ ვიტყვი არც ერთ ჟურნალისტზე, რომ ის დასაჭერია. ეს არაა ჩემი კომპეტენცია, მე ვისაუბრო დეპუტატმა, ვინმე დასაჭერია თუ არა. ეს არაა ჩემი გადასაწყვეტი… კონკრეტულად მე ნამდვილად არ ვფიქრობ, რომ თუნდაც ამ შემთხვევაში შორენა ღლონტი მისაცემი იყოს სისხლის სამართლებრივ პასუხისგებაში, ეს არის ჩემი სუბიექტური აზრი, მაგრამ ეს არაა ჩემი შესაფასებელი.

ნეტგაზეთის მასალების სხვა გამოცემებში გადაბეჭდვის წესი
ავტორი