Batumelebi | ბათუმის ბულვარში ატრაქციონები 6 ივლისიდან ამუშავდება ბათუმის ბულვარში ატრაქციონები 6 ივლისიდან ამუშავდება – Batumelebi

ბათუმის ბულვარში ატრაქციონები 6 ივლისიდან ამუშავდება

ბათუმის ბულვარში მომდევნო კვირიდან ატრაქციონები ამუშავდება. ბულვარის ადმინისტრაციის პრესსამსახურის ინფორმაციით, მიმდინარეობს ატრაქციონების მფლობელებთან შესაბამისი ხელშეკრულებების გაფორმება.

„იჯარის ხელშეკრულებებს აუქციონის გარეშე, პირდაპირი წესით გავაფორმებთ და დოკუმენტაციის მოწესრიგების შემდეგ, მომდევნო კვირიდან, ბულვარის ტერიტორიაზე ყველა ატრაქციონი იმუშავებს. რაც შეეხება ბულვარის საკუთრებაში არსებულ ტრენაჟორებს და საბავშვო გასართობ ატრაქციონებს, მათით სარგებლობა უკვე დაშვებულია,“ – გვითხრეს ბულვარის პრესსამსახურში.

იზოლაციისა და კარანტინის წესებით, ამ დრომდე აკრძალულია სპორტული, კულტურული და გასართობი ღონისძიებების ორგანიზება/ჩატარება, მათ შორის  გასართობი პარკების/ატრაქციონების ფუნქციონირება.

მთავრობის ახალი დადგენილებით, ეს აკრძალვა ორშაბათიდან, 6 ივლისიდან, მოიხსნება გასართობ პარკებსა და ატრაქციონებზე.

2020 წლის 6 ივლისიდან საქმიანობის აკრძალვა „არ ვრცელდება სამუზეუმო საქმიანობასა და გასართობი პარკების/ატრაქციონების ფუნქციონირებაზე, რომლებიც უნდა განხორციელდეს „სამუშაო ადგილებზე ახალი კორონავირუსის (COVID-19) გავრცელების თავიდან აცილების მიზნით რეკომენდაციების დამტკიცების თაობაზე“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ბრძანების შესაბამისად,“ – აღნიშნულია მთავრობის დადგენილებაში.

ამ თემაზე:

როდიდან შეიძლება შეზლონგზე წამოწოლა – ახალი წესები პლაჟზე

ბათუმის მერია „ეშმაკის ბორბალს“ 383 000 ლარად ასხვისებს – აუქციონი

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com