აჭარის ფინანსთა და ეკონომიკის სამინისტრო ბათუმში, ადლიის დასახლებაში მდებარე 49 200 კვ.მ არასასოფლო-სამეურნეო დანიშნულების მიწის ნაკვეთს ელექტრონულ აქციონზე პირობებით ყიდის. საწყისი ფასი 4 700 000 ლარია, ბიჯი – 120 000 ლარი. შესაბამისად, 1 კვ/მ-ის საწყისი გასაყიდი ფასი 97,9 ლარია.
მყიდველი ვალდებული იქნება შეძენილ ნაკვეთზე აამოქმედოს საწარმო, რაშიც არანაკლებ 20 მილიონი ლარის ინვესტიცია უნდა განახორციელოს. მასვე ევალება, საწარმოს ამოქმედებიდან 1 თვის ვადაში, ამავე საწარმოში არანაკლებ 50 საქართველოს მოქალაქის დასაქმებაც.
აუქციონის პირობები:
- საბოლოო საპრივატიზებო საფასურის [“ბე“-ს (საწყისი საპრივატიზებო საფასურის 25%-ის ოდენობით) გამოკლებით] გადახდა აუქციონის დასრულებიდან თანაბარწილად, 3 ეტაპად, კერძოდ:
2021 წლის 20 ივნისამდე არანაკლებ 25%-ის გადახდა;
2021 წლის 20 დეკემბრამდე არანაკლებ 25%-ის გადახდა;
2022 წლის 20 ივნისამდე დარჩენილი საპრივატიზებო საფასურის გადახდა. - შესაბამისი ნასყიდობის ხელშეკრულების გაფორმებიდან არაუგვიანეს 2 თვის ვადაში არანაკლებ ქონების საწყისი საპრივატიზებო ღირებულების 1%-ის უპირობო და გამოუხმობი საბანკო გარანტიის წარმოდგენა, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას;
- ხელშეკრულების გაფორმებიდან 9 თვის ვადაში ქალაქ ბათუმის მუნიციპალიტეტის საკრებულოს მიერ დადგენილი „სამრეწველო ზონა 1“-ის შესაბამისი საწარმოს მშენებლობის ნებართვის მიღება;
- ხელშეკრულების გაფორმებიდან 24 თვის ვადაში, საკუთრებაში გადაცემულ ქონებაზე შესაბამისი მშენებლობის ნებართვის მიხედვით საწარმოსათვის განკუთვნილი შენობა/ნაგებობის ექპლოატაციაში მიღება;
- ხელშეკრულების გაფორმებიდან 36 თვის ვადაში საკუთრებაში გადაცემულ ქონებაზე, საწარმოს ამოქმედება (წარმოების ხაზი, გარდა ინერტული მასალების წარმოებისა);
- საწარმოს ამოქმედებიდან 1 თვის ვადაში არანაკლებ 50 საქართველოს მოქალაქის დასაქმება;
- დასაქმებულთა რაოდენობისა და საწარმოს პროფილის შენარჩუნება ობიექტის ამოქმედებიდან არანაკლებ 15 წლის განმავლობაში;
- აღნიშნულ პროექტში არაუგვიანეს 36 თვის ვადაში არანაკლებ 20 000 000 ლარის ინვესტიციის განხორციელება.
ელექტრონული აუქციონი დაწყებულია და ის 2020 წლის 30 ივნისს დასრულდება.