Batumelebi | ბათუმის მერიის ინსპექცია 42 560 ლარად სპეცტანსაცმელს იყიდის ბათუმის მერიის ინსპექცია 42 560 ლარად სპეცტანსაცმელს იყიდის – Batumelebi

ბათუმის მერიის ინსპექცია 42 560 ლარად სპეცტანსაცმელს იყიდის

ბათუმის მუნიციპალური ინსპექციისთვის სპეციალური ტანსაცმლის შესაძენად 42 560 ლარია გათვალისწინებული ქალაქის ბიუჯეტიდან. ინსპექციამ სპეცტანსაცმლის შესყიდვაზე ტენდერი უკვე გამოაცხადა.

ინსპექცია ყიდულობს 133  ქურთუკს, ამდენივე ჟილეტს, 266-266 მაისურს მოკლე და გრძელი სახელოთი, 133 კეპს და 133 საწვიმარ ლაბადას.

ტენდერის პირობის მიხედვით, ტანსაცმელი იკერება ინდივიდუალური, თითოეულ თანამშრომელზე ზომის აღებით [ყოველ თანამშრომელზე ზუსტი ზომის მორგებით]. არაზუსტი ზომების შემთხვევაში, შესყიდვის ობიექტი დაუბრუნდება მიმწოდებელს გასასწორებლად.

ბათუმის მუნიციპალურ ინსპექციაში 176 პირია დასაქმებული.

„მიმწოდებელი ვალდებულია შესყიდვის ობიექტთან ერთად წარმოადგინოს მოწოდებულ საქონელზე გამოყენებული ქსოვილის შემადგენლობის და წონის შესახებ სსიპ „ლევან სამხარაულის სახელობის სასამართლო ექსპერტიზის ეროვნული ბიუროს“, SGS, INTERTEK ან სხვა აკრედიტებული პირის მიერ გაცემული შესაბამისი დასკვნა, რომლითაც უნდა დასტურდებოდეს გამოყენებული ქსოვილის შემადგენლობის შესაბამისობა სატენდერო დოკუმენტაციით მოთხოვნილი მასალის შემადგენლობასთან. აღნიშნული ექსპერტიზის ხარჯებს ანაზღაურებს მიმწოდებელი“, – აღნიშნულია ტენდერში.

მუნიციპალური ინსპექცია, პირობის მიხედვით, „უფლებამოსილია საქონლის მიწოდებისას მიმწოდებლის თანდასწრებით შეარჩიოს შესყიდვის ობიექტის ნიმუშები დამატებითი კვლევისთვის. ხოლო, იმ შემთხვევაში, თუკი კვლევის შედეგად დადგინდება, რომ იგი/ისინი არ შეესაბამება ხელშეკრულებით განსაზღვრულ მოთხოვნებს, უარი განაცხადოს მთლიანი რაოდენობის მიღებაზე“.

სპეცტანსაცმელი ინსპექციას ხელშეკრულების გაფორმებიდან 30 დღეში უნდა ჩაბარდეს. ტენდერში წინადადებების მიღება 14 ივნისს დაიწყება და 16 ივნისს მთავრდება.

ბათუმის მერიის მუნიციპალური ინსპექცია სამხრე კამერებითაც აღიჭურვება. ინსპექციამ 49 კამერის შესყიდვაზე ელექტრონული ტენდერი 23 520 ლარით გამოაცხადა და ზუსტად ამ თანხაზე გააფორმა ხელშეკრულება შპს „კომპიუტერშოპთან“ მიმდინარე წლის მარტში.

რა ევალება ბათუმის მუნიციპალურ ინსპექციას, ნახეთ ბმულზე:

ბათუმის მუნიციპალური ინსპექცია სამხრე კამერებით იმოძრავებს

მთავარი ფოტო: ბათუმის მუნიციპალური ინსპექციისთვის შესაძენი სპეცტანსაცმლის ესკიზები / ტენდერიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com