ბათუმელმა გარემოვაჭრე ნანა კინწურაშვილმა დღეს, 9 ივნისს, მას შემდეგ დაიკავა აჭარის უმაღლეს საბჭოში დეპუტატის სავარძელი, როცა სხდომათა დარბაზი დეპუტატმა ელგუჯა ბაგრატიონმა დატოვა.
დღეს უმაღლეს საბჭოს ანგარიშს აჭარის მთავრობის თავმჯდომარე, თორნიკე რიჟვაძე აბარებს. მას გარემოვაჭრეები უმაღლეს საბჭოსთან აქციით დახვდნენ, მათ გამოფინეს ტანსაცმელი, რომლის გაყიდვის შესაძლებლობა არ ეძლევათ.
„ჩვენ გვქონდა სხვადასხვა ალტერნატივა, თუ როგორ უნდა შეგვენარჩუნებინა სამსახური, თუმცა არავინ მოგვისმინა,”- თქვეს გარემოვაჭრეებმა, რომლებსაც არც თორნიკე რიჟვაძე შეხვდა და არც უმაღლესი საბჭოს თავმჯდომარე, დავით გაბაიძე.
სხდომაზე გარემოვაჭრის დასწრება უმაღლესი საბჭოს დეპუტატმა, „ნაციონალური მოძრაობის“ წევრმა ელგუჯა ბაგრატიონმა მოითხოვა, რასაც ხანგრძლივი კამათი მოჰყვა. დავით გაბაიძემ ბაგრატიონს სხდომის დატოვება მოსთხოვა, თუმცა მანდატურებმა ეს შესვენების გამოცხადების მიუხედავად ვერ შეძლეს. საბოლოოდ, ელგუჯა ბაგრატიონმა დარბაზი მას შემდეგ დატოვა, როცა სხდომაზე მოქალაქის შემოშვებაზე მიიღო დაპირება.
სხდომა რამდენიმე წუთში მოქალაქემაც დატოვა – მას საბჭოს აპარატის თანამშრომელმა მოუწოდა, მოქალაქეებისთვის განკუთვნილი სკამი დაეკავებინა.
“საერთოდ აღარ მინდა აქ,”- გაბრაზდა მოქალაქე და დარბაზი დატოვა. იგი ამბობს, რომ მერიის წარმომადგენლებმა ხუთასი ლარით დააჯარიმეს.
სხდომას აღარ ესწრებიან “ნაციონალური მოძრაობის” წარმომადგენლებიც.
“მე მოგიწოდებთ, ის ადამიანი მაინც მოიკითხოთ, რომელიც უკვე მე-12 დღეა აჭარის ტელევიზიასთან შიმშილობს,”- მიმართა უმაღლესი საბჭოს დეპუტატებს გიორგი დიასამიძემ „ნაციონალური მოძრაობიდან“, ვიდრე სხდომას დატოვებდა.
