„დღეს ჩვენი დამოუკიდებლობის დღეს ვზეიმობთ. ჩვენი დამოუკიდებლობა დღეს პირველი რესპუბლიკის იდეალებით და ოცნებებით არის ნასაზრდოები, რომელიც სამართლიანობის, სოლიდარობის, თავისუფლების იდეებზე იდგა და ქართული სოციალ-დემოკრატიის უნიკალურ გამოცდილებას დაეფუძნა,“ – წერს სოციალ;ურ ქსელ ფეისბუქში თამთა მიქელაძე, „ადამიანის უფლებების სწავლების და მონიტორინგის ცენტრის“ ხელმძღვანელი. ინფორმაცია დღეს, 26 მაისს ამ ორგანიზაციამ გაავრცელა იმის შესახებ, თუ რატომ არ ვართ დამოუკიდებლები. ამ ფეისბუქპოსტს უცვლელად გთავაზობთ.
„სამწუხაროდ, დღეს ჩვენს დამოუკიდებლობას პოლიტიკური პოტენციალი დაკარგული აქვს. ჩვენ არ ვართ დამოუკიდებლები პოლიტიკურად, რადგან ხალხის ნება და რეალური საჭიროებები და ინტერესები განდევნილია პოლიტიკის სფეროდან;
ჩვენ არ ვართ დამოუკიდებლები ეკონომიკურად, რადგან ეკონომიკური ძალაუფლება ჩვენი ყვლეფისა და რესურსების, გარემოს, საჯარო სივრცეების განადგურებით მიიღწევა და ეს პროცესი სრულად არის გაყვანილი დემოკრატიული კონტროლის გარეთ;
ჩვენ არ ვართ დამოუკიდებლები სოციალურად, რადგან ქვეყანაში უკიდურესი სიღარიბე და მზარდი ეკონომიკური უთანასწორობაა, ჩვენი ყოველდღიური გადარჩენა კი მძიმე და ღირსების შემლახავი შრომით არის შესაძლებელი.
ჩვენ არ ვართ დამოუკიდებლები გეოპოლიტიკურად, რადგან ჩვენი ქვეყნის დიდი ნაწილი ოკუპირებულია და რუსეთს ეს შიდა პოლიტიკაში ინტერვენციის პირდაპირ გზას უხსნის. დევნილები, ოკუპირებულ ტერიტორიებზე და მათ გარშემო მცხოვრები ადამიანები კი უკიდურესი სიღარიბის, გარიყულობისა და იმედგაცრუების წინაშე დგანან.
ჩვენ არ ვართ დამოუკიდებლები კულტურულად, რადგან ჩვენ კულტურა, რომელიც ცივილიზაციების დიალოგზე, ჰიბრიდულობაზე და მრავალფეროვნებაზე იდგა სტერილური და ცარიელი გახდა. ამ სიცარიელეს ზოგჯერ გლობალური კულტურული ფორმების განმეორებით ვავსებთ.
ჩვენ არ ვართ დამოუკიდებლები მორალურად, რადგან ბაზრის ეთიკამ, რომელიც ასაგნებს ყველაფერს – შრომას, ბუნებას, ადამიანს, დროს და შოვინიზმის მძიმე ფორმებმა სოლიდარობის იდეალები და პრაქტიკა დაგვისუსტა.
ჩვენ არ ვართ დამოუკიდებლები ინტელექტუალურად, რადგან ცოდნის წარმოების პროცესი აკადემიებში, საგანმანათლებლო დაწესებულებებში სუსტია და ის ჩვენს ისტორიაზე, კონტექსტზე დაფუძნებული ცოდნის შექმნის შესაძლებლობას გვართმევს.
დღეს ჩვენ გიზიარებთ ამ პესიმიზმს არა უიმედობისთვის, არამედ ჩვენი ყოფის კრიტიკული გაცნობიერებისთვის, რომელიც ყოველთვის ახალ პერსპექტივას, ძალას და მომავლის ჭვრეტას აჩენს. მომავლის, რომელიც თავისუფლების, თანასწორობის და სამართლიანობის იდეალებს დაეფუძნება და სხვადასხვა სოციალურ და კულტურულ ჯგუფებს შორის დემოკრატიული დიალოგის, თვითორგანიზების და სოლიდარობის რეალური პრაქტიკით მიიღწევა,“ – წერს თამთა მიქელაძე.
