Batumelebi | ვინ და რისთვის გადაუხადა მადლობა 10 ათას პედაგოგს ვინ და რისთვის გადაუხადა მადლობა 10 ათას პედაგოგს – Batumelebi

ვინ და რისთვის გადაუხადა მადლობა 10 ათას პედაგოგს

ბოლო რამდენიმე დღეა პედაგოგების ჯგუფები ფეისბუქში ერთმანეთს წარმატებას ულოცავენ და სერტიფიკატის ფოტოებს აზიარებენ, სადაც წერია, რომ სერტიფიკატი მათ გლობალური პანდემიის პირობებში დისტანციური სწავლების ეფექტიანად წარმართვისა და ინოვაციური საგანმანათლებლო პლატფორმების გამოყენებისთვის გადაეცათ. ზოგიერთმა პედაგოგმა მიიჩნია, რომ სერტიფიკატი მასწავლებლებს განათლების სამინისტრომ დაურიგა, მათ კი არ შეხვდათ, რის გამოც უკმაყოფილება გამოხატეს. ერთ-ერთი მასწავლებლის თქმით კი, „TV- სკოლის მასობრივი სერტიფიცირება იყო ორი მნიშვნელოვანი საკითხის დემონსტრირება: თვითკმაყოფილება და საზოგადოებისთვის მტკიცება, რომ მასწავლებელიც ღირებულ საქმეს ემსახურება“. მისი აზრით, კოლეგებს აღიარების დეფიციტი აქვთ.

ვინ აღიარა პედაგოგების დისტანციური შრომა და რა დატვირთვა აქვს რეალურად ამ სერტიფიკატს? თემაზე „ბათუმელები“ პლატფორმა TV school.ge-ს გენერალურ დირექტორს, ირაკლი ჯინჯიხაძეს ესაუბრა. სერტიფიკატების გაცემა სწორედ ამ ორგანიზაციის იდეაა.

  • ბატონო ირაკლი, რამდენი პედაგოგია ჩართული TV school.ge-ში და რამდენმა მიიღო სერტიფიკატი?

ათი ათასზე მეტმა მასწავლებელმა მიიღო ჩვენი სერტიფიკატი. ეს იყო მადლიერების გამომხატველი ჟესტი, რადგან მასწავლებლები ძალიან სტრესულ გარემოში იმყოფებოდნენ ამ პერიოდში და სერტიფიკატის გადაცემით მათ დავუფასეთ გაწეული შრომა. სერტიფიკატების გარდა ჩვენი პლატფორმით მასწავლებლებს ბევრი პრობლემა მოვუგვარეთ.

  • მაგალითად, რა პრობლემა?

ონლაინპლატფორმა TVschool.ge მასწავლებლებს საშუალებას აძლევს, მარტივად შექმნან ან გამოიყენონ უკვე შექმნილი დავალებები მოსწავლეებისთვის და მიიღონ უკუკავშირიც.

  • სხვა პლატფორმებისგან განსხვავებით აქვს რაიმე უპირატესობა TV school.ge-ს?

უპირატესობა არის სიმარტივე და ის, რომ ჩვენ გვაქვს მზა დავალებები კლასების და საგნების მიხედვით, მათ შორის, სპორტსა და მუსიკაშიც. ნებისმიერ კლასში ნებისმიერ თემაზე მასწავლებელს შეუძლია ჩვენთან დავალება იპოვოს და არ დახარჯოს დიდი ადამიანური რესურსი მოსწავლისთვის დავალებების შედგენისთვის.

  • თქვენ ამბობთ, რომ გამზადებული დავალებები ხვდებათ მასწავლებლებს. მასწავლებლის შრომა რაში გამოიხატება, თუკი ყველაფერი მითითებულია?

მასწავლებლის ფუნქციაა საჭირო თემა აირჩიოს და მას შემდეგ, რაც მოსწავლე დავალებას შეასრულებს, ჩვენ თემის თითოეულ კითხვაზე გამზადებული გვაქვს ახსნა-განმარტებებიც, ანუ მასწავლებელს აღარ უწევს დამატებითი ძალისხმევის გაღება იმაზე, განმარტოს როგორ უნდა ამოიხსნას, ვთქვათ, ამოცანა ან გაკეთდეს რომელიმე დავალება. ამიტომ, როცა მასწავლებელი გადაწყვეტს, რომ გამოიყენოს ესა თუ ის დავალება, ახსნა-განმარტებების ველიც გამოუჩნდება.

გათვლა იყო ის, რომ სასწავლო პროცესი მასწავლებლისთვის გამარტივებულიყო, რადგან მათ ყოველდღიურად ისედაც უწევთ მოსწავლეებისთვის დავალებების შექმნა და რასაც აქამდე აკეთებდა კალმით და ფურცლით, ახლა გააკეთებს ონლაინ ან ისარგებლებს გამზადებული დავალებებით.

სტატისტიკურად რომ შევხედოთ, ამ ყველაფერში მასწავლებელი კვირაში დაახლოებით 7-10 საათს ხარჯავს, ამ პლატფორმის გამოყენების შემთხვევაში კი, სადღაც 30 წუთი ეხარჯება. გამოდის, მასწავლებელი 10 საათს ზოგავს კვირაში დავალებებისთვის. მაშინ, როცა ეს დრო შეუძლია გამოიყენოს სხვა რამეში, მაგალითად, ბავშვებთან ინდივიდუალური მუშაობისთვის, განსხვავებული სასწავლო აქტივობების დაგეგმისთვის და ა.შ.

ირაკლი ჯინჯიხაძე, ტვ-სკოლის გენერალური დირექტორი

  • რას განსაზღვრავს თქვენს პლატფორმაზე არსებული დავალებები, მოსწავლის კონკრეტულ ცოდნას თუ უბრალოდ, განმავითარებელი შეფასებისთვისაა განსაზღვრული?

ამ ფორმატში შედგენილი დავალება განსაზღვრავს, იცის თუ არა მოსწავლემ კონკრეტული თემა. ასევე, შეიძლება იყოს ღია დავალებები, ტესტური დავალებები და ა.შ. გარდა ამისა, სამინისტრომ ორიენტაცია აიღო, რომ კომპლექსური დავალებებითაც შეფასდეს მოსწავლე. ამიტომ, ჩვენ მალე დავამატებთ პლატფორმას კომპლექსურ დავალებებსაც და ჩვეულებრივი, სტანდარტული დავალებების გარდა ამაზეც ექნებათ წვდომა მასწავლებლებს.

  •  როგორ ავრცელებთ ინფორმაციას მასწავლებლებში TV school.ge – შესახებ?

ჩვენ ყველა სკოლას და რესურსცენტრს მივაწოდეთ ელექტრონულ ფოსტაზე ინფორმაცია. დარეგისტრირდება თუ არა პედაგოგი, ეს მისი გადასაწყვეტია. გარდა ამისა, გვაქვს კომუნიკაცია ფეისბუქგვერდზე და რეგულარულად ვაქვეყნებთ სიახლეებს. მასწავლებლების დიდი ნაწილი, ვინც დარეგისტრირდა, აქტიურად იყენებს ამ პლატფორმას, ზოგი უფრო პასიურად.  ჩვენ სერტიფიკატები გადავეცით ყველა იმ მასწავლებელს, ვისაც გარკვეული აქტივობა ჰქონდა ამ პლატფორმაზე დისტანციური სწავლების პერიოდში.

  • ეს პროექტი ბიუჯეტიდან ფინანსდება, ცალკე პროექტია თუ „ტელესკოლის“ ნაწილია?

არა, ეს არის ცალკე, დამოუკიდებელი პროდუქტი და არ ფინანსდება სახელმწიფო ბიუჯეტიდან. მსგავსი პლატფორმა საქართველოში აქამდე არ არსებობდა. ჩვენი ჯგუფი 2012 წლიდან საგანმანათლებლო სფეროში მუშაობს და ამ მიმართულებით გარკვეული გამოცდილება გვაქვს. ამ პროექტზე მუშაობა 2019 წელს დავიწყეთ და საქართველოს ტექნოლოგიური პარკის  გრანტიც მოვიპოვეთ,  ამავე პროექტით გავიმარჯვეთ ნიდერლანდური სტარტაპ აქსელერატორის მიერ გამოცხადებულ კონკურსში, სადაც 10 საუკეთესო კომპანიას შორის მოვხვდით.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com