„ჩვენ დავბრუნდით, მაგრამ ახლაც გვგონია, რომ ეს დაბრუნება დროებითია… „ჰეშთეგის“ გუნდი დაასუსტეს, მაგრამ გაძლიერდა წინააღმდეგობის მუხტი“, – ამ სიტყვებით მიმართეს დღეს აჭარის ტელევიზიის გადაცემა „ჰეშთეგის“ წამყვანებმა მაყურებელს – ორთვიანი პაუზის შემდეგ დღეს, 25 მაისს, „ჰეშთეგი“ ეთერში დაბრუნდა. აჭარის რადიოში კი, 90 წლის იუბილე აღნიშნეს, საიუბილეო ტორტი ტელევიზიის დირექტორს – გიორგი კოხრეიძეს გააჭრევინეს. ამ დროს რადიოს საინფორმაციო სამსახურის რედაქტორი პოლიციას აძლევდა ჩვენებას – დირექტორის, „გიორგი კოხრეიძისგან კრიტიკულად განწყობილი ჟურნალისტების დევნის საქმეზე“.
გადაცემა „ჰეშთეგი“ 23 მარტის შემდეგ არ გასულა ეთერში. გადაცემის წამყვანებმა დღევანდელ ეთერში სტუმრებთან საუბრის დაწყებამდე ხაზი გაუსვეს იმას, რომ პანდემიის პირობებში მოდიფიცირებული ფორმატით შესაძლებელი იყო მუშაობა, მაგრამ მათ ამის შესაძლებლობა არ მისცეს.
„ვვარაუდობთ, რომ მაუწყებლის მენეჯმენტს არ სურდა გვესაუბრა იმაზე, რომ ქვეყანაში ადამიანებს არათუ სახლში დარჩენა, არამედ მინიმალური საჭიროებების დაკმაყოფილება არ შეუძლიათ, რომ ათასობით მოქალაქის დასაცავად აქამდე სახელმწიფოს არაფერი გაუკეთებია და მათი უდიდესი ნაწილი სახლში უბრალოდ იმის გამო ვერ დარჩებოდა, რომ სახლი ფიზიკურად არ აქვს… ყოველი მეხუთე ბავშვი კორონამდე შიმშილობდა და არავინ იცის, კორნავირუსის დროს მათ რა ბედი ეწიათ,“ – აღნიშნა „ჰეშთეგის“ წამყვანმა, მარიამ ტაკიძემ.
გადაცემა პირველი ჰეშთეგი დღეს ასეთი იყო – „მალხაზისთვის“. საუბარია მალხაზ რეხვიაშვილზე, რომელიც 11 მაისამდე გადაცემა „ჰეშთეგის“ ერთ-ერთი წამყვანი და მაუწყებელში ალტერნატიული პროფკავშირის თავმჯდომარე იყო და ის ფეისბუქპოსტის გამო გაათავისუფლა სამსახურიდან გიორგი კოხრეიძემ.
„…ბევრი ვიფიქრეთ, ღირდა თუ არა საერთოდ ამ უსამართლობის შემდეგ ეთერში დაბრუნება, თუმცა საბოლოოდ გადავწყვიტეთ, რომ ბრძოლა გრძელდება,“ – თქვა გადაცემის წამყვანმა, ივანე ბაკურაძემ.
გადაცემის წამყვანებმა თქვეს ისიც, რომ მალხაზ რეხვიაშვილი „ჰეშთეგის“ გუნდის წევრად რჩება და მას ხშირად ვნახავთ ეთერში. „შრომითი კონტრაქტის გაწყვეტა არ ნიშნავს გუნდიდან ვინმეს გარიცხვას“, – დასძინა მარიამ ტაკიძემ.
რაც შეეხება რადიოს იუბილეს – 90 წლის საიუბილეო შეხვედრისა და ტორტის გაჭრის ამსახველი ფოტოები პირად ფეისბუქგვერდზე თამილა დოლიძე გამოაქვეყნა. თამილა დოლიძე მრჩეველთა საბჭოს წევრია „ქართული ოცნებიდან“.
____
მთავარი ფოტო: სელფი „ჰეშთეგში“ მალხაზ რეხვიაშვილთან ერთად. კადრი გადაცემის ვიდეომასალიდან
