31 მაისს თამბაქოსგან თავისუფალი მსოფლიო დღე აღინიშნება. ამ დღესთან დაკავშირებით ჯანდაცვის მსოფლიო ორგანიზაცია [ჯანმო] თამბაქოს მარკეტინგთან ბრძოლის კამპანიას აანონსებს.
ჯანმოს განცხადებით, თამბაქოს მარკეტინგის კამპანია მიმართულია მომხმარებელთა ახალი თაობის აღზრდისკენ.
ჯანმო: თამბაქოს კომპანიები გამუდმებით ეძებენ ახალ მომხმარებლებს, რომ ჩაანაცვლონ ამ პროდუქტის მოხმარების გამო გარდაცვლილი მომხმარებლები
თამბაქოს მოხმარების შედეგად მსოფლიოში ყოველწლიურად 8 000 000 ადამიანი იღუპება. ჯანმოს განცხადებით, შემოსავლების შესანარჩუნებლად თამბაქოს მწარმოებელი და მისი მონათესავე მრეწველობები იძულებულნი არიან გამუდმებით ეძებონ ახალი მომხმარებლები, რომლებიც ჩაანაცვლებენ მათ, ვინც ამ პროდუქციის მოხმარების შედეგად გარდაიცვალა.
„თამბაქოს კომპანიებმა დახარჯეს 8 მილიარდი აშშ დოლარი მარკეტინგსა და რეკლამაზე, ხოლო მსოფლიომ თამბაქოს მოხმარების შედეგად და პასიური მწეველობის ზეგავლენის გამო დაკარგა 8 მილიონი ადამიანი,“ – წერს ჯანმო და თამბაქოს საწინააღმდეგო წლევანდელი კამპანიის ფარგლებში ასაჯაროებს თამბაქოსა და მისი მონათესავე მრეწველობების მიერ მოზარდების მოსაზიდად გამოყენებულ რამდენიმე ტაქტიკას.
მოზარდების ჯანმრთელობასთან დაკავშირებული ქცევების შემსწავლელ ბოლო გლობალური კვლევაში წერია, რომ მოზარდებში ალკოჰოლისა და თამბაქოს მოხმარების შემცირებულია, მაგრამ ამჟამინდელი მომხმარებლების მაჩვენებელი 15 წლის მოზარდებში კვლავ მაღალია. 45 ქვეყანაში გამოკითხული 15 წლის მოზარდების 15% -ს მოუწევია სიგარეტი ბოლო 30 დღის განმავლობაში, 7%-ს კი – კანაფი.
სიგარეტი ერთხელ მაინც მოუწევია საქართველოში გამოკითხული 15 წლის მოზარდი ბიჭების 23%-ს და გოგოების- 9%-ს. კითხვაზე, მოგიწევიათ თუ არა სიგარეტი ბოლო 30 დღის განმავლობაში, დადებითი პასუხი გასცა საქართველოში გამოკითხული 11 წლის ბიჭების 3%-მა და გოგონების 3%-მა; ასევე, 13 წლის ასაკის ბიჭების 4%-მა და გოგონების 2%-მა.
ჯანმო აქვეყნებს თამბაქოს ნაწარმის მწარმოებლებისა და მათთან დაკავშირებული პროდუქტების მარკეტინგის მაგალითებს, რომლებიც ბავშვებსა და მოზარდებზეა გათვლილი:
- 15000-ზე მეტი დასახელების არომატიზატორის გამოყენება, რომელთა უმეტესობა შექმნილია იმისთვის, რომ ბავშვებისა და მოზარდებისთვის პროდუქცია უფრო მიმზიდველი გახდეს;
- თამბაქოს ნაწარმის რეკლამირებისთვის, სოციალური ქსელებისა და ქსელების ავტორიტეტული მომხმარებლების გამოყენება;
- კულტურული და გასართობი ღონისძიებების სპონსორობა;
- სასწავლო გრანტების უზრუნველყოფა;
- პროდუქტის მიმზიდველი და თანამედროვე დიზაინი;
- ფარული რეკლამა ახალი ამბების/საინფორმაციო და გასართობ ინდუსტრიებში;
- პროდუქტის უფასო ნიმუშების დარიგება;
- თაროებზე პროდუქტების განთავსება ბავშვის თვალის დონეზე;
- სკოლების მახლობლად პროდუქციის დემონსტრირება და რეკლამირება;
ბოლო წლებში საქართველოში ელექტრონული სიგარეტები ძალიან პოპულარული გახდა, მას ხშირად ნამდვილი სიგარეტის მოწევისთვის თავის დასანებებლადაც იყენებენ, თუმცა, ჯანმო იუწყება, რომ ნიკოტინი, რომელსაც ელექტრონული სიგარეტის სითხეები შეიცავს, იწვევს ძალიან ძლიერ შეჩვევას, დამოკიდებულებას და შეიძლება ზიანი მიაყენოს ბავშვის თავის ტვინს, რომელიც ჯერ კიდევ არ არის სრულად ფორმირებული. ამასთანავე, იმ მოზარდებს, რომლებიც ელექტრონულ სიგარეტს მოიხმარენ, მოგვიანებით ასაკში ორჯერ უფრო მეტი რისკი აქვთ, რომ ნამდვილი სიგარეტის მომხმარებლები გახდებიან, ვიდრე დანარჩენ მათ თანატოლებს.
ელექტრონული სიგარეტის მომხმარებლების დიდი ნაწილი მიიჩნევს, რომ ეს საშუალება ჯანმრთელობისთვის არ არის საზიანო, თუმცა, ჯანმოს ცნობით, ეს ასე არ არის. ჯანმო იუწყება, რომ ელექტრონული სიგარეტის გამოყენება ზრდის გულ-სისხლძარღვთა და ფილტვის დაავადებების განვითარების რისკს.
- თამბაქოს მოხმარება, მსოფლიო მასშტაბით, კიბოთი გარდაცვალების მიზეზების 25% -ს შეადგენს. ნიკოტინის შემცველი და თამბაქოს ნაწარმის გამოყენება ზრდის კიბოს, გულ-სისხლძარღვთა და ფილტვის დაავადებების განვითარების რისკს.
- ყოველწლიურად 1 მილიონზე მეტი ადამიანი იღუპება მეორადი კვამლისგან.
- ჩილიმის მოწევა ისეთივე მავნებელია, როგორც თამბაქოს მოხმარების სხვა გზები. ჩილიმის კვამლი ტოქსიკურია, იგი კარცეროგენულ ნივთიერებებს შეიცავს.
