Batumelebi | ბრაზილიელი აბორიგენებისთვის Covid 19 შესაძლოა განსაკუთრებით სახიფათო აღმოჩნდეს ბრაზილიელი აბორიგენებისთვის Covid 19 შესაძლოა განსაკუთრებით სახიფათო აღმოჩნდეს – Batumelebi
RU | GE  

ბრაზილიელი აბორიგენებისთვის Covid 19 შესაძლოა განსაკუთრებით სახიფათო აღმოჩნდეს

ბრაზილიაში ვირუსის გავრცელებიდან პირველად, ბოლო დღე-ღამის განმავლობაში, კორონავირუსით ინფიცირებული 1000 ადამიანი გარდაიცვალა. როგორც სპეციალისტები ამბობენ, ქვეყანაში გარდაცვალებათა პიკი ჯერ არ დამდგარა და დაავადების გავრცელების ამ ნიშნულამდე ჯერ კიდევ რამდენიმე კვირაა.

ბრაზილიაში კორონავირუსით ინფიცირების 271 628 შემთხვევაა დადასტურებული, გარდაცვლილია 17 971 ადამიანი.

თუმცა ბრაზილიას არ აქვს საკმარისი რაოდენობის ტესტები და შესაბამისად ვარაუდობენ, რომ აღურიცხავი ინფიცირებულთა რიცხვი გაცილებით მეტია.

ვირუსის სწრაფი გავრცელების გამო შიშობენ, რომ ის განსაკუთრებით დააზარალებს დაავადებების მიმართ მოსახლეობის გაცილებით მოწყვლად ნაწილს: ბრაზილიის ღარიბ რაიონებს და აბორიგენებს.

როგორც BBC იუწყება, ბრაზილიის პრეზიდენტმა ბოლსონარომ თანამდებობიდან გასულ კვირას დაითხოვა ჯანდაცვის მინისტრი ნელსონ ტეიჰა, რომლის ადგილიც ლუის ენრიკე მანდეტამ დაიკავა. ჯანდაცვის ყოფილი მინისტრი და პრეზიდენტი ქლოროქინის გამოყენების პირობებსა და სოციალური დისტანცირების წესებზე ვერ შეთანხმდნენ.

ბრაზილიაში ვირუსის გავრცელების სწრაფი ტემპის მიუხედავად, პრეზიდენტი ბოლსონარო აცხადებს, რომ ვირუსი საშიში არ არის და საჯარო გამოსვლებში ის კორონავირუსს გრიპს ადარებს.

პროსამთავრობო პრესის ტვიტერზე სამშაბათს, როცა გარდაცვლილთა ყველაზე მაღალი მაჩვენებელი იყო ბრაზილიაში, გამოაქვეყნეს მხოლოდ კორონავირუსისგან გამოჯანმრთელებულთა რიცხვი, თუმცა არ იყო მითითებული გარდაცვლილთა რაოდენობის შესახებ.

ბოლსონარო და ბრაზილიის მინისტრთა ნაწილი საჯარო გამოსვლებში მკაცრად აკრიტიკებს ჯანდაცვის მსოფლიო ორგანიზაციას და მას კორონავირუსის პანდემიის უარყოფით გაშუქებაში ადანაშაულებს. ბრაზილიის ხელისუფალთა ნაწილს მიაჩნია, რომ მხოლოდ ვირუსის მსხვერპლთა რაოდენობაზე კეთდება აქცენტი და არა გამოჯანმრთელებულებზე.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com