10 დღეზე მეტია აჭარაში კორონავირუსის ახალი შემთხვევა არ გამოვლენილა, ბათუმში კი Covid19-სგან კიდევ ერთი პირი გამოჯანმრთელდა – ამის შესახებ დღეს, 11 მაისს, აჭარის ჯანდაცვის მინისტრის მოადგილემ, ნინო ნიჟარაძემ განაცხადა. მისივე თქმით, უახლოეს პერიოდში კიდევ 5 პირის განმეორებითი ტესტირების პასუხს ელიან და ამის შემდეგ გადაწყდება მათი კლინიკა „მედალფადან“ გაწერის საკითხი.
ბოლო მონაცემებით, კლინიკა „მედალფაში“ 14 პაციენტი მკურნალობს Covid19-ზე, მათ შორის, ერთის მდგომარეობა სტაბილურად მძიმეა.
აჭარაში ჯამში 43 პირი განიკურნა კორონავირუსისგან, ჩატარდა 7200-ზე მეტი ტესტირება.
„ჩვენი პროგნოზით, ყველაზე რთული და საპასუხისმგებლო პერიოდი იწყება ახლა, ვინაიდან მკაცრი შემზღუდავი ღონისძიებების ფონზე მივიღეთ კარგი ეპიდემიოლოგიური სიტუაცია, ეს რომ შენარჩუნდეს, უნდა შევასრულოთ რეკომენდაციები, აუცილებელია დავიცვათ სოციალური დისტანცირება, გამოვიყენოთ ნიღბები, მაქსიმალურად ვეცადოთ, ავირიდოთ თავიდან მასიური თავშეყრა,“ – განაცხადა ნინო ნიჟარაძემ.
11 მაისის მონაცემებით, საქართველოში დადასტურებულია ახალი კორონავირუსის 638 შემთხვევა, მათგან გამოჯანმრთელდა 317 ადამიანი, გარდაიცვალა – 10.
ამავე თემაზე:
განკურნებულთა რაოდენობა აქტიური შემთხვევების რიცხვს აჭარბებს – ბოლო მონაცემები
