Batumelebi | „რა ვქნა, რა დავიფიცო“ – სულიკო თებიძე ენმ-ის ანტიკრიზისულ პროექტზე „რა ვქნა, რა დავიფიცო“ – სულიკო თებიძე ენმ-ის ანტიკრიზისულ პროექტზე – Batumelebi

„რა ვქნა, რა დავიფიცო“ – სულიკო თებიძე ენმ-ის ანტიკრიზისულ პროექტზე

„რაზე დავიფიცო, რა გავაკეთო? – მზად ვარ, ნებისმიერი საქმიანი წინადადება მივიღო, მაგრამ მათ მიერ დაყენებული ინიციატივები, ყველა იყო არაკანონიერი, ადრეც ჰქონდათ. ნებისმიერმა იურისტმა შემიფასოს, რომ მე არაკანონიერად მოვიქეცი, დავწერ განცხადებას და წავალ, მართლა გეუბნებით. არ გავაკეთებ არაკანონიერს ამ ასაკში, გამორიცხულია“, – გვითხრა ბათუმის საკრებულოს თავმჯდომარემ სულიკო თებიძემ.

საქმე ეხება საკრებულოს ოპოზიციის მიერ წარდგენილ ანტიკრიზისულ გეგმას, რომელიც ხვალ, 8 მაისს, რიგგარეშე სხდომაზე უნდა განიხილონ, იმ შემთხვევაში, თუ ეს სხდომა შედგა. საკრებულოს თავმჯდომარე ცდილობს დაგვარწმუნოს, რომ კოლეგებთან მას მხოლოდ კონსტრუქციული თანამშრომლობა უნდა, თუმცა ისინი ამაზე „არ მოდიან“: „მათ მხოლოდ ხმაური უნდათ“.

ხვალინდელი სხდომა ბათუმის საკრებულოს ისტორიაში მის გამართვამდეც კი, უჩვეულო და უპრეცედენტოა, რამდენიმე  მიზეზის გამო.

პირველი ისაა, რომ სხდომა საკრებულოს თავმჯდომარეს არ ჩაუნიშნია და მისი გამართვის ინიციატორი, ასევე გადაწყვეტილების მიმღებიც, ფრაქცია„ერთიანი ნაციონალური მოძრაობაა“. ოპოზიცია ბათუმის ანტიკრიზისული გეგმის საკუთარი პროექტის დღის წესრიგში შეტანას და მის განხილვას წინა სხდომაზეც ითხოვდა, თუმცა საკრებულომ ასეთი გადაწყვეტილება არ მიიღო.

შემდეგი ნაბიჯი იყო ის, რომ ფრაქციამ, პროექტის განხილვის მიზნით, რიგგარეშე სხდომის გამართვა ოფიციალურად მოითხოვა, თუმცა საკრებულოს თავმჯდომარემ სხდომა არ დანიშნა. სულიკო თებიძე მიიჩნევს, რომ ის, რასაც მისი კოლეგები ითხოვენ, ანტიკონსტიტუციურია:

„გააჩნია საკითხს, ისეთ საკითხს იხილავს, რომლის განხილვაც საკრებულოს სხდომაზე არაკანონიერია“.

საკრებულოს თავმჯდომარის განმარტებით, ანტიკრიზისული გეგმა საბიუჯეტო ცვლილებებს ითვალისწინებს, რისი განხილვაც მხოლოდ მერიის წარდგენითაა შესაძლებელი:

„თვითმმართველობის კოდექსის თანახმად, საკრებულო არ არის უფლებამოსილი, აღმასრულებელ ორგანოს დაავალოს ბიუჯეტში ცვლილებების განხორციელება. მათ თავისუფლად შეეძლოთ ეთანამშრომლათ მერიასთან, როგორც მე, პირადად, ვთანამშრომლობ ყველასთან, ოღონდ ვინმემ რაიმე წინადადება მოიტანოს. მათ ეს წინადადებები არ მოუტანიათ, ეს გააკეთეს ხმაურისთვის. დილით შემოაგდეს, რომ ეხმაურათ. შემდეგ დაიხურეს ქუდი და წავიდნენ“.

ეს ბათუმის საკრებულოს პირველი სხდომაა, რომელსაც საკრებულოს თავმჯდომარე არ დაესწრება და ამის შესახებ წინასწარ ვიცით: „მე არ ვესწრები“, ამბობს სულიკო თებიძე და იმასაც ვარაუდობს, რომ სხდომას არც „ოცნების“ უმრავლესობა დაესწრება: „მგონი არა. მე ვერავის ვერ დავავალებ შენ დაესწარი, შენ არა-მეთქი“.

უჩვეულოა, რომ ეს არის საკრებულოს პირველი სხდომა, რომლის შესაძლო ჩაშლის ალბათობას ამავე საკრებულოს მიერ გავრცელებული განცხადება უშვებს.

„მოცემულ შემთხვევაში საკრებულოს თითოეული წევრი დამოუკიდებლად იღებს გადაწყვეტილებას საკრებულოს რიგგარეშე სხდომაზე დასწრებასთან დაკავშირებით. მოქმედი კანონმდებლობის შესაბამისად, საკრებულო უფლებამოსილი იქნება განიხილოს წარმოდგენილი ინიციატივა, თუ სხდომას დაესწრება საკრებულოს წევრთა სრული შემადგენლობის უმრავლესობა (13 წევრი)“, – ნათქვამია განცხადებაში, რომელიც ენმ-ის ფრაქციის მიერ სხდომის მოწვევასთან დაკავშირებით საკრებულომ გაავრცელა.

კანონის თანახმად, იმ შემთხვევაში, თუ ამ სხდომას არ დაესწრება საკრებულოს თავმჯდომარე, სხდომას უხელმძღვანელებს საკრებულოს თავმჯდომარის მოადგილე, ხოლო მათი არყოფნის შემთხვევაში, სხდომაზე დამსწრე საკრებულოს უხუცესი წევრი.

სათუოა, შეძლებს თუ არა ენმ-ს ფრაქცია საკრებულოს 13 წევრის შეკრებას სხდომის გასამართად.

23-წევრიან საკრებულოში „ნაციონალური მოძრაობის“ ფრაქციაში საკრებულოს ოთხი წევრია გაერთიანებული, 12 წევრია „ოცნების“ უმრავლესობის ფრაქციაში. „ოცნების“  პოზიციებს იზიარებენ ფრაქცია „მრეწველები“ და „კონსერვატორებიც“ [სულ ექვსი წევრი]. პრაქტიკული გამოცდილების მიხედვით, თუ „ოცნება“ გადაწყვეტს, ოპონენტების მიერ ჩანიშნული სხდომა ქვორუმის არარსებობის მიზეზით ჩაშალოს, ამ გადაწყვეტილებას ეს ორი ფრაქციაც შეუერთდება. რჩება კიდევ ერთი – 3-წევრიანი დამოუკიდებელი ფრაქცია, რომლის მხარდაჭერა სხდომის გასამართად საკმარისი არ იქნება.

მთავარი ფოტო: ენმ-ის ფრაქციის თავმჯდომარე მირდატ ქამადაძე და საკრებულოს თავმჯდომარე სულიკო თებიძე

ნეტგაზეთის მასალების სხვა გამოცემებში გადაბეჭდვის წესი
ავტორი