საქართველოს პრემიერ-მინისტრის, გიორგი გახარიას განცხადებით, 5 მაისიდან ბათუმსა და ქუთაისში გადაადგილებაზე დაწესებული შეზღუდვები მოიხსნება.
პრემიერ-მინისტრის განცხადებით, შეზღუდვები დარჩება თბილისსა და რუსთავში, თუმცა გახარია აღნიშნავს, რომ კვირის ბოლომდე შესაძლოა ეს ქალაქებიც გაიხსნას:
„მოგეხსენებათ, რამდენიმე კვირის წინ ჩვენ მივიღეთ იძულებითი ღონისძიება ჩაგვეკეტა მსხვილი ქალაქები. ხვალიდან ისეთ ქალაქებში, როგორიც არის ბათუმი და ქუთაისი ყველა შეზღუდვა გადაადგილებაზე მოიხსნება. დარჩება შეზღუდვები თბილისსა და რუსთავში და ეს არის დაკავშირებული ეპიდემიოლოგიურ მდგომარეობასთან მომიჯნავე რაიონებში.
თუმცა მინდა გითხრათ, რომ ეპიდემიოლოგიური სიტუაციიდან გამომდინარე შესაბამისი გადაწყვეტილებები იქნება მიღებული. ვფიქრობ, შესაძლებელია იმედი გვქონდეს, კვირის ბოლომდე ეს საკითხი თბილისსა და რუსთავზეც დადებითად გადაწყდება,“ – თქვა გახარიამ.
ქალაქების გახსნის მიუხედავად, ძალაში რჩება კომენდანტის საათი, ანუ, საღამოს 9 საათიდან დილის 6 საათამდე გადაადგილება აკრძალულია.
ასევე, ძალაში ჩება რეკომენდაციები და წესები, რომლებიც ავტომანქანით გადაადგილებას შეეხება. მაგალითად, აკრძალულია, მძღოლის ჩათვლით 3 პირზე მეტის ყოფნა მსუბუქ ავტომანქანაში. ამასთან, მძღოლის გვერდით ადგილი თავისუფალი უნდა იყოს.
