„რომ არ გვიჭირდეს, ამ თხის ფერმაში რა გვინდა“ – ოჯახები ბათუმში საკვებს ითხოვენ [ვიდეო]

ბათუმში, ივანე მესხის ქუჩაზე, ყოფილი რძის ქარხნის ტერიტორიაზე, 21 ოჯახი ცხოვრობს. ოჯახები ქარხნის შენობაში 4 წლის წინ თვითნებურად შესახლდნენ. პანდემიის დაწყებამდე აქ მცხოვრებთა უმეტესობა დასაქმებული იყო, მაგრამ ახლა ყველა უმუშევარია. მოქალაქეები ამბობენ, რომ თითქმის ორთვიანმა უმუშევრობამ ისინი უსახსროდ დატოვა – პროდუქტების ყიდვაც კი აღარ შეუძლიათ.

„ზოგი  ქემალფაშაში მუშაობდა გამყიდველად მაღაზიაში, ზოგი მშენებლობაზე, ზოგი საქორწინო დარბაზში დამლაგებლად, მამაკაცები თურქეთში გადადიოდნენ და რაღაც სამუშაოებს ასრულებდნენ. ახლა  ყველა ვართ უმუშევარი. ვის არ მივმართეთ, მაგრამ არავინ არ დაგვეხმარა. არც სამუშაო გვაქვს და არც ფული, რომ  საჭმელი მაინც ვიყიდოთ. შევალ ფეისბუქზე, გატენილია ეს ფეისბუქი, ამას ვეხმარებით, იმას ვეხმარებით. ჩვენთან არავის არაფერი მოუტანია,“ –  ამბობს გელა აბაშიძე.

გულფერ ბასილაძე პენსიონერია. ორი წელია ისიც, როგორც თავად ამბობს, „თხების ფერმაში“ ცხოვრობს. მისი ორივე შვილი ახლა უმუშევარია. ქალის თქმით, პროდუქტები გაუთავდათ, მაგრამ საჭმლის ყიდვისთვის ფული არ აქვთ.

„გვიჭირს, რომ არ გვიჭირდეს, ამ თხის ფერმაში რა გვინდა. ქირა ვერ გადავიხადე. საქორწინო დარბაზში ვმუშაობდი. დავრჩი უმუშევარი. ჩემი მეუღლე თურქეთში დადიოდა, ჩაისა და თხილს  კრეფდა, ახლა ვერ გადადის,“ – ამბობს მზევინარ აბაშიძე.

აქ მცხოვრებლები შიშობენ, რომ ხელისუფლების ყურადღება შეიძლება ვერც მომავლში მიიქციონ და შიმშილის პირისპირ აღმოჩნდნენ.

https://www.facebook.com/batumelebi/videos/275257980172287/