„ენერგო-პრო ჯორჯიას“ აბონენტებს, რომლებმაც მარტის თვეში 36 ლარის და 43 თეთრის ან ამაზე ნაკლები თანხის ელექტროენერგია მოიხმარეს, დენის გადასახადს სახელმწიფო დაუფარავს.
შესაბამისი შეტყობინებები ამ კატეგორიის მომხმარებლებმა კომპანიისგანაც მიიღეს, თუმცა ზოგიერთ მათგანს იგივე კომპანიისგან კვლავ მიუვიდა შეტყობინებები, რომ თუ მარტის თვის დავალიანებას არ გადაიხდიან, შეუწყდებათ დენის მიწოდება.
„ბათუმელები“ დაუკავშირდა „ენერგო-პრო ჯორჯიას“. კომპანიაში განაცხადეს, რომ ეს არის ერთგვარი პროგრამული ხარვეზი.
„შეტყობინებები ავტომატურად დაიგზავნა ყველგან, ისე, როგორც წინა თვეებში. ამიტომ იმ აბონენტებმა, რომლებსაც ეხება სახელმწიფო სუბსიდია, არ მიაქციონ ამ გაფრთხილებას ყურადღება. მათ მარტის თვის გადასახადს დაუფარავს სახელმწიფო და დენის მიწოდება არ შეუწყდებათ,“ – გვითხრეს „ენერგო-პრო ჯორჯიას“ პრესსამსახურში.
კომპანიამ თავის ფეისბუქგვერდზე გამოაქვეყნა ინფორმაცია, რომ „ენერგო-პრო ჯორჯიას” აბონენტებს, რომლებმაც მარტში მოიხმარეს 200 კვტ-ზე მეტი ელექტროენერგია, დღეს მიუვიდა მოკლე ტექსტური შეტყობინება, გადასახდელი საფასურის შეხსენების და არგადახდის შემთხვევაში მოსალოდნელი გათიშვის შესახებ.
მოკლე ტექსტური შეტყობინება ავტომატურად იგზავნება და ამიტომ აღნიშნული სმს მიიღეს იმ აბონენტების ნაწილმაც, რომლებმაც მარტში მოიხმარეს 200 კვტ-ს ჩატვლით ელექტროენერგია.
„ენერგო-პრო ჯორჯია“ კიდევ ერთხელ აცხადებს, რომ აბონენტები, რომლებმაც მარტში მოიხმარეს 200 კვტ ან ნაკლები ელექტროენერგია, მთავრობის მიერ განსაზღვრულ სუბსიდირების პროგრამაში ავტომატურად ერთვებიან.
საქართველოს ყველა მოქალაქეს, რომელიც თვეში მოიხმარს 200 კილოვატზე ნაკლებ ელექტროენერგიას, სამი თვის განმავლობაში – მარტში, აპრილსა და მაისში, სრულად დაუფინანსდება კომუნალური გადასახადები.
„ენერგო-პრო ჯორჯიას“ აბონენტების შემთხვევაში კი, 200 კილოვატი სწორედ 36 ლარი და 43 თეთრია.
ამ თემაზე ვრცლად:
მოსახლეობის ნაწილს 3 თვის კომუნალურ გადასახადებს დავუფარავთ – გახარია
