აჭარაში კორონავირუსის 2 ახალი შემთხვევა დადასტურდა – ამის შესახებ დღეს, 9 აპრილს, აჭარის ჯანდაცვის მინისტრმა, ზაალ მიქელაძემ განაცხადა.
„ეს არიან ერთი ოჯახის წევრები, დედა-შვილი, დედა 40 წლამდე, ბავშვი 10 წლამდე, რომლებიც რამდენიმე დღის წინ გადმოვიდნენ თურქეთის რესპუბლიკიდან და იყვნენ საკარანტინო ზონაში. ეს არის იმპორტირებული შემთხვევა,“ – განაცხადა ზაალ მიქელაძემ. პაციენტებს გადმოსვლიდან რამდენიმე დღის შემდეგ აღმოაჩნდათ სიმპტომები კარანტინში და მეხუთე დღეს დაუდასტურდათ კორონავირუსი.
ამჟამად აჭარაში, ბათუმში, კლინიკა „მედალფაში“, ახალი ორი შემთხვევის ჩათვლით, 16 პაციენტს მკურნალობენ COVID-19-ზე. მათგან ერთი პაციენტის მდგომარეობა სტაბილურად მძიმეა.
9 აპრილის 20 საათის მონაცემებით, საქართველოში დადასტურებულია კორონავირუსის 218 შემთხვევა, გამოჯანმრთელდა 50 ადამიანი, გარდაიცვალა – 3.
კარანტინში 4 722 ადამიანი იმყოფება, სტაციონარში მეთვალყურეობის ქვეშ კი – 408.