26 მილიონამდე ლარს გადაუხდიან 88 სასტუმროს საკარანტინო ზონის მოწყობისთვის

საქართველოს ტურიზმის ეროვნულმა ადმინისტრაციამ 25 მარტიდან 5 აპრილის ჩათვლით პერიოდში კიდევ 33 ხელშეკრულება გააფორმა სასტუმროებში საკარანტინო ზონების მოწყობაზე. ადმინისტრაცია ამ ხელშეკრულების ფარგლებში სასტუმროებს ჯამში  3 275 486 ლარს გადაუხდის.

ეს სასტუმროები საქართველოს სხვადასვა რეგიონში, მათ შორის, აჭარაშიც მდებარეობს.

ქვეყნის მასშტაბით საკარანტინო ზონების მოწყობაზე 88 სასტუმროსთან ხელშეკრულებები მთლიანობაში 25 975 674 ლარზეა გაფორმებული. სასტუმროებს თანხას ფაქტობრივი მომსახურების მიხედვით გადაუხდიან. ამასთან, რამდენიმე მფლობელმა სასტუმროები კარანტინისთვის სახელმწიფოს უფასოდ დაუთმო.

საკარანტინო ზონების მოწყობის უზრუნველყოფა და შესაბამისი ხელშეკრულებების გაფორმება მთავრობამ ტურიზმის ეროვნულ ადმინისტრაციას დაავალა.

საქართველოში 21 აპრილის ჩათვლით საგანგებო მდგომარეობაა გამოცხადებული. პრეზიდენტის მიერ გამოცემული დეკრეტის მიხედვით კი, საქართველოს მთავრობას მიეცა უფლება, აუცილებლობის შემთხვევაში, საკარანტინო, საიზოლაციო და სამედიცინო მიზნებისათვის მის მიერ დადგენილი წესით შეზღუდოს საკუთრების უფლება და გამოიყენოს ფიზიკურ და იურიდიულ პირთა ქონება და მატერიალური საშუალებები.

2020 წლის 9 აპრილის დილის მონაცემებით კარანტინის რეჟიმში 4 559 მოქალაქე იმყოფება. ეს მონაცემი მუდმივად იცვლება – 14 დღის გასვლის შემდეგ მოქალაქე, რომელსაც კორონავირუსის სიმპტომები არ აღენიშნება, ტოვებს კარანტინს, ხოლო სიმპტომების მქონე მოქალაქეები გადაჰყავთ სტაციონარში. 

ბათუმში განთავსებული საკარანტინო ზონებიდან იმ მოქალაქეების ტრანსპორტირებას მათი საცხოვრებელი ადგილების მიხედვით, რომლებსაც საკარანტინო ვადა გაუვიდათ და სიმპტომები არ აღენიშნებათ, ბათუმის მერია უზრუნველყოფს. მიკროავტობუსებით მოქალაქეთა ეტაპობრივად გადაყვანაზე ხელშეკრულება ქალაქის მერიამ კერძო კომპანიასთან 50 ათას ლარზე გააფორმა.

რა ვალდებულებები აქვთ აღებული სასტუმროებს ხელშეკრულებით, დეტალურად შეგიძლიათ ნახოთ ამ ბმულზე:

12 მილიონი ლარი 42 სასტუმროს – საკარანტინო ზონის მოწყობისთვის