ჯანდაცვის მსოფლიო ორგანიზაციის გენერალურმა დირექტორმა, ტედროს გებრეისუსმა, ფრანგი ექიმების ორაზროვანი კომენტარი, გატესტონ Covid 19-ის პოტენციური სამკურნალო მედიკამენტი აფრიკაში, შეაფასა, როგორც რასისტული და თქვა, რომ დროა კოლონიალური მენტალიტეტისგან საბოლოოდ გამოფხიზლებისა.
“სიმართლე გითხრათ, ამან შემძრა. და ეს მაშინ, როცა მე ვთქვი, რომ ჩვენ გვჭირდება სოლიდარობა – ასეთი ტიპის რასისტული გამონათქვამები არ დაგვეხმარება, ეს სოლიდარობის წინააღმდეგ მიდის”, – თქვა ტედროსმა ჟენევაში, ჯანმოს მიერ გამართულ ბოლო ბრიფინგზე. მისი ეს შეფასება მიემართება განცხადებას, რომელიც გასულ კვირას, ერთ-ერთი სატელევიზიო განხილვისას გააკეთა პარიზის კოჰინის ჰოსპიტლის, ინტენსიური თერაპიისა და რეანიმაციის განყოფილების დირექტორმა, ექიმმა ჟან-პოლ მირამ და ჯანმრთელობისა და მედიცინის კვლევის საფრანგეთის ეროვნული ინსტიტუტის (Inserm) კვლევითი ცენტრის ხელმძღვანელმა, კამილ ლოჰტმა.
– “თუ შეიძლება ვიქნები პროვოკაციული… ხომ არ უნდა ჩავატაროთ ეს კვლევა აფრიკაში, სადაც არ არის პირბადეები, სამკურნალო საშუალებები და რეანიმაცია?… ცოტათი ჰგავს აივისთვის ჩატარებულ კვლევებს, სადაც სექსმუშაკებთან ვცდით რაღაცებს, რადგან ვიცით, რომ ისინი არიან მაღალი რისკის ქვეშ და ისინი არ იცავენ თავს”
– “მართალი ხარ, ჩვენ ვფიქრობთ მსგავსი ტიპის კვლევის ჩატარებაზე აფრიკაში – ბცჟ-სა და პლაცებოთი”.
“აფრიკა ვერ და არ იქნება რომელიმე ვაქცინის გამოცდის ადგილი. ყველა წესის დაცვით დავტესტავთ ნებისმიერ ვაქცინას თუ სამკურნალო წამლებს, გამოვიყენებთ ზუსტად ერთსა და იმავე წესს, ერთსა და იმავე პროტოკოლს მთელი მსოფლიოს მასშტაბით, ევროპა იქნება ეს, აფრიკა თუ სხვა ადგილი, სადაც საჭირო იქნება ტესტირება, რათა ვუმკურნალოთ ადამიანებს ყველგან თანასწორად და ერთნაირად”, – თქვა ტედროს გებრეისუსმა. – “და ნაბახუსევი კოლონიალური მენტალიტეტიდან უნდა შეწყდეს”.
მისივე თქმით, ჯანმო არ დაუშვებს, რომ ეს მოხდეს. “სამარცხვინო და შემაძრწუნებელია 21-ე საუკუნეში მეცნიერებისგან ასეთი ტიპის განცხადების მოსმენა. უკიდურესად ვგმობთ მას და გარწმუნებთ, რომ ეს არ მოხდება აფრიკაში, არც სადმე სხვაგან, ნებისმიერ ქვეყანაში. ყველგან იმუშავებს სათანადო პროტოკოლი და ადამიანებს მოეპყრობიან, როგორც ადამიანებს, რადგან ჩვენ ყველანი ადამიანები ვართ”, – თქვა მან.
ჯანმოს გენერალურმა დირექტორმა თქვა, რომ, სავარაუდოდ, მიმდინარე კვირაში ჯანმო გამოაცხადებს ორ დიდ ინიციატივას, რომ დაჩქარდეს ვაქცინების კვლევები, მათი შემუშავება და წარმოება, ასევე შეიმუშავებენ ვაქცინების თანაბარი და სამართლიანი დისტრიბუციის მექანიზმებს – “მანამ, სანამ ვაქცინას ვიპოვით, უნდა გადავლახოთ პროდუქტების (ვაქცინა იქნება ეს თუ სამკურნალო საშუალება) თანაბარი და სამართლიანი დისტრიბუციის ბარიერები. პრობლემას უნდა მივხედოთ დროულად. ამიტომ ამაზე იმუშავებენ სპეციალისტები ჩრდილოეთიდან და სამხრეთიდან, რომლებიც განიხილავენ დეტალებს, თუ როგორ დააჩქარებენ წარმოებას და უზრუნველყოფენ პროდუქციის თანაბარ დისტრიბუციას. სოლიდარობა აქ ძალიან მნიშვნელოვანია. როცა ვაქცინა ან წამალი იქნება მზად, ჩვენ უნდა შეგვეძლოს მისი ჩატანა მთელ მსოფლიოში და არ უნდა იარსებოს განსხვავებამ მდიდრებსა და უქონლებს შორის“.
