Batumelebi | ბათუმში COVID-19 დაუდასტურდა ქალს, რომლის ინფიცირების წყარო დადგენილი არ არის ბათუმში COVID-19 დაუდასტურდა ქალს, რომლის ინფიცირების წყარო დადგენილი არ არის – Batumelebi

ბათუმში COVID-19 დაუდასტურდა ქალს, რომლის ინფიცირების წყარო დადგენილი არ არის

დღეს, 7 აპრილს, აჭარის ჯანდაცვის მინისტრის მოადგილემ, ნინო ნიჟარაძემ განაცხადა ბათუმში კორონავირუსით ინფიცირების ახალი შემთხვევის შესახებ.

„კლინიკა „მედალფაში“ გვაქვს 10 დადასტურებული შემთხვევა, დაგვემატა ერთი, 60 წლამდე პირი, რომლის იდენტიფიცირება მოხდა წუხელ, გვიან ღამით. ახლა მიმდინარეობს ეპიდკვლევითი სამუშაოები, კონტაქტების მოძიება.

აღნიშნული პირის ინფიცირების წყარო ამ ეტაპზე არ არის დადასტურებული, მიდის აქტიური მოძიება. განვმარტავ, ზოგადად კონტაქტად ითვლება ის პირი, რომელსაც სიმპტომების გამოვლენამდე, 48 საათის განმავლობაში ჰქონდა დაუცველი შეხება აღნიშნულ ქალბატონთან 15 წუთი და მეტი ხნის განმავლობაში.

ეს ქალბატონი გახლავთ ბათუმში მცხოვრები, მან გასული ორი დღის განმავლობაში მიმართა ორ სხვადასხვა სამედიცინო დაწესებულებას, მას არ ჰქონდა კორონავირუსისათვის დამახასიათებელი ცხელებით რესპირაციული ჩივილები, ის აღნიშნავდა მხოლოდ მუცლის ტკივილს და დიარეას. ეჭვის მიტანის შემდეგ გადაყვანილი იქნა კლინიკა „მედალფაში“ დიაგნოსტიკისათვის, სადაც შემთხვევა დადასტურდა,“ – განაცხადა ნინო ნიჟარაძემ.

ნინო ნიჟარაძის განცხადებით, იმ სამედიცინო დაწესებულებებში, სადაც ქალი იმყოფებოდა, 5 პირი კარანტინში იმყოფება, ორი კი – თვითიზოლაციაში. ეს ის პირები არიან, რომლებიც არ იყვნენ ეკიპირებულნი.

მინისტრის მოადგილემ აღნიშნა, რომ ინფიცირებული ქალი ბათუმში არ ცხოვრობს კორპუსში, ის გასული ათი დღის განმავლობაში იმყოფებოდა ქობულეთის მუნიციპალიტეტის ერთ-ერთ სოფელში. ნინო ნიჟარაძის ინფორმაციით, ქალს აღენიშნება ორმხრივი პნევმონია, თუმცა მისი მდგომარეობა მძიმე არ არის.

„ჩვენ ამის მოლოდინი უკვე გვაქვს, მთელს აჭარაში გვეყოლება ისეთი პირები, რომელთა ინფიცირების წყარო ვერ იქნება დადგენილი და იდენტიფიცირებული, ამიტომ თითოეული პირი უნდა შეეცადოს საკუთარი თავის დაცვას, სოციალურ დისტანცირებას და მორიდებას სხვა პირებთან ურთიერთობისას.

ჩვენ მოსალოდნელი მატება, რა თქმა უნდა, გვექნება, ვერ ვიქნებით გამონაკლისი. მოვუწოდებ ყველას, დაიცვას უსაფრთხოება, დაიცვას სოციალური დისტანცია, მოარიდოს თავი ნებისმიერი საზოგადოებრივი თავშეყრის ადგილას დაყოვნებას, აუცილებლად გამოიყენოს ნიღაბი, სპირტიანი და სადეზინფექციო ხელის ხსნარები. და სოციალური დისტანცია ისევ და ისევ, თითოეული ჩვენგანი არის პასუხისმგებელი საკუთარი და სხვების ჯანმრთელობაზე,“ – განაცხადა ნინო ნიჟარაძემ.

ბოლო მონაცემებით, ბათუმში, კლინიკა „მედალფაში“ 10 პაციენტს მკურნალობენ კორონავირუსის დადასტურებული დიაგნოზით. მათგან ერთის მდგომარეობა სტაბილურად მძიმეა.

7 აპრილის 10 საათის მონაცემებით, საქართველოში კორონავირუსის დადასტურებული შემთხვევების რაოდენობა არის 195.  მათ შორის გამოჯანმრთელდა 39 ადამიანი, გარდაიცვალა – 2. 

კარანტინის რეჟიმში იმყოფება 4735 პირი, სტაციონარში მეთვალყურეობის ქვეშ – 383 ადამიანი.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com