მას შემდეგ, რაც საქართველოში კორონავირუსის პრევენციის ფარგლებში საგანგებო მდგომარეობა გამოცხადდა, ათასობით ადამიანი დროებით უმუშევარი დარჩა. რთულ სიტუაციაში აღმოჩნდნენ ის ადამიანები, რომლებიც დღიურ შემოსავალზე იყვნენ დამოკიდებული, განსაკუთრებით კი სოციალურად დაუცველ, მრავალშვილიან ოჯახებს გაუჭირდათ.
სწორედ ასეთი ადამიანების დასახმარებლად, საზოგადოებრივი მაუწყებლის აჭარის ტელევიზიის ჟურნალისტმა თეონა თურმანიძემ ფეისბუქზე საქველმოქმედო კამპანია წამოიწყო.
„მახსოვს, ერთ-ერთი ნიუსი გავაზიარე და თან მეუხერხულა, რომ მხოლოდ ამით შემოვიფარგლე. ჩავთვალე, მხოლოდ ნიუსის გაზიარება არ იქნებოდა საკმარისი. ფეისბუქზე სტატუსი დავწერე, დასაქმებულ ადამიანებს ხომ არ გვეცადა, რომ 20-20 ლარი ჩამოგვეჭრა ხელფასიდან. იქვე დავწერე, რომ ვისაც ამის საშუალება არ აქვს, 5-10 ლარი ჩარიცხეთ-მეთქი. თავიდან მეგონა მაქსიმუმ 1000-მდე ლარს შევკრებდით, საბოლოოდ კი 8 600 ლარის შეგროვება შევძელით,“ – ამბობს თეონა თურმანიძე.
თეონა ამბობს, რომ უკიდურესად გაჭირვებული ოჯახების ბაზა ჯანდაცვის სამინისტრომ გადასცა. ამას გარდა, საკუთარი ძალებით მოიძია ისეთი ოჯახები, რომელთაც დახმარება სჭირდებოდათ. ჯამში 43 ოჯახი. თითოეულ მათგანს შეგროვილი თანხიდან თეონამ 200 ლარი გადასცა.
თეონას თქმით, რომ არა მეგობრების დახმარება, მარტო არაფერი გამოუვიდოდა. თეონა და მისი მეგობრები, სამი დღის მანძილზე, ოჯახ-ოჯახ დადიოდნენ, ადგილზე ეცნობოდნენ არსებულ სიტუაციას და ამის შემდეგ აძლევდნენ თანხას.
„როდესაც ვარჩევდით ოჯახებს, შერჩევის კრიტერიუმი იყო ამ ოჯახების შემოსავალი. ავარჩიეთ უკიდურესად გაჭირვებული ოჯახები.
ერთ მაგალითს გეტყვით. მივედით ოჯახში, რომელიც კი იყო სოციალურად დაუცველი, მაგრამ ჯამში მათი შემოსავალი თვეში 900 ლარამდე ადიოდა. ასევე ჰყავდათ ძროხა, რომელიც ერთ-ერთ საქველმოქმედო ორგანიზაციას უყიდია მათთვის. ჩვენ ამ ოჯახს თანხა არ მივეცით. სოფელში ვიკითხეთ, ვინ იყო უფრო გაჭირვებული და ვიპოვეთ კაცი, რომელიც სამ შვილთან ერთად უფანჯრო სახლში ცხოვრობს. მათი ყოველთვიური შემოსავალი კი 250 ლარს არ სცდებოდა. თანხა გადავეცით ამ ოჯახს,“ – ამბობს თეონა.
ასეთ სახლში ცხოვრობდა ერთ-ერთი ოჯახი, რომელსაც ქველმოქმედებით შეგროვილი თანხა გადასცეს
43 ოჯახიდან 7 ოჯახთან ვერ შეძლეს მხოლოდ ადგილზე მისვლა. ამ ოჯახებს თანხა საბანკო ანგარიშზე ჩაურიცხეს.
თეონას თქმით, მნიშვნელოვანია მოქალაქეებმა იგრძნონ პასუხისმგებლობა იმ ადამიანების მიმართ, ვისაც ამ ეტაპზე ყველაზე მეტად სჭირდება დახმარება.
„ჩემი ამ წამოწყების შემდეგ ჩემმა სხვა კოლეგებმაც დაიწყეს საქველმოქმედო აქციების ორგანიზება ფოთსა და ზუგდიდში. აჭარის ტელევიზიაში მუშაობს ჩემი კოლეგა ლევან დევაძე. ის თავისი მეგობრების დახმარებით აგროვებს თანხას, პროდუქტებს და მიაქვს გაჭირვებული ოჯახებისთვის. ახლა უამრავი ადამიანია ძალიან ცუდ დღეში და სანამ შეგვიძლია, უნდა დავეხმაროთ,“- ამბობს თეონა.
აქცია ერთჯერადი არ არის და ის გრძელდება. თანხის შეგროვების მეორე ეტაპი 18 აპრილიდან დაიწყება. ამ წუთას საქველმოქმედო ანგარიშზე 667 ლარია. თეონას თქმით, აგროვებს ახალი ოჯახების ბაზას, ვისაც დახმარება სჭირდება, ხოლო უკვე დახმარებული ოჯახებიდან უკიდურეს სიღარიბეში მცხოვრებ 6 ოჯახს, კიდევ ერთხელ დაეხმარებიან.
„იმდენი გაჭირვებული ოჯახი ცხოვრობს… ამ ოჯახების ბედი და სიტუაცია კორონავირუსის შემდეგაც ასეთი იქნება. ეს ერთჯერადი დახმარება ბევრს არაფერს არ ცვლის, მაგრამ ახლა მათი დახმარება მნიშვნელოვანია,“ – ამბობს თეონა.
