დღეს, 4 აპრილს, საქართველოს პრემიერ-მინისტრი გიორგი გახარია და საქართველოს ჯანდაცვის მინისტრი ეკატერინე ტიკარაძე ბათუმის ახალ რესპუბლიკურ საავადმყოფოში იმყოფებოდნენ. რესპუბლიკური საავადმყოფო კორონავირუსით გამოწვეული ინფექციის მართვაში ერთვება.
„რესპუბლიკური საავადმყოფო ეტაპობრივად ფუნქციონირებას დაიწყებს 4 დღეში, მაგრამ სრულ სიმძლავრეზე გავა დაახლოებით 7-10 დღის განმავლობაში. ეს იქნება იქნება ამ ეტაპზე ქოვიდ 19-ის წინააღმდეგ მებრძოლი, სრულად სპეციალიზებული ცენტრი“ – განაცხადა გიორგი გახარიამ.
საქართველოს მთავრობის ცნობით, სამედიცინო დაწესებულებას უკვე გადაეცა 9 ხელოვნური სუნთქვის აპარატი მძიმე შემთხვევების სამკურნალოდ.
საავადმყოფო სამედიცინო აპარატურით და საწოლებით უახლოეს დღეებში აღიჭურვება და იქნება მზად პაციენტების მისაღებად.
ბათუმის რესპუბლიკური საავადმყოფო
მთავრობის ინფორმაციით, ახალი კლინიკის სრული აღჭურვა აპრილის ბოლომდე დასრულდება. კლინიკა ერთდროულად 170-მდე პაციენტის მომსახურებას შეძლებს. საავადმყოფო სამედიცინო მომსახურებით უზრუნველყოფს მძიმე პაციენტებს ყველა მიმართულებით.
ამ ეტაპზე მიმდინარეობს შენობის მიღება-ჩაბარებაც. შენობა აჭარის ფინანსთა და ეკონომიკის სამინისტროს შპს „სტადიონმა“ უნდა ჩაიბაროს, შემდეგ კი გადაწყდება, თუ ვის გადაეცემა საავადმყოფო მართვაში.
ამავე თემაზე:
ბათუმში საკარანტინო ზონას აწყობენ – ერთ-ერთ ვერსიად ახალ რესპუბლიკურს განიხილავენ
