ბათუმის ინფექციურ საავადმყოფოში ვირუსის სიმპტომებით რვა პირი შეიყვანეს, ინფორმაციას აჭარის ჯანდაცვის სამინისტროში ადასტურებენ, თუმცა ამ დროისათვის არ ვიცით, იმყოფებოდნენ თუ არა ეს პირები კარანტინში ან თვითიზოლაციაში და აქვთ თუ არა მათ უცხოეთში მოგზაურობის ისტორია.
სამინისტროს ინფორმაციით, მათ ტესტი ჩაუტარდებათ.
დღეს, 2 აპრილს, დილით, ინფექციურ საავადმყოფოში ხუთ პირს კორონავირუსი არ დაუდასტურდა, ორი პაციენტის პასუხს კი ამ დრომდე ელოდებიან.
2 აპრილის დილის მდგომარეობით, ბათუმში კორონავირუსით დაინფიცირებულ 8 ადამიანს მკურნალობენ. ბათუმში გუშინ COVID-19 დაუდასტურდა 10 წლის ბავშვსაც, რომელიც თბილისში გადაიყვანეს.
2 აპრილს საქართველოში კორონავირუსით დაინფიცირების კიდევ 13 შემთხვევა დადასტურდა. ამ დროისთვის კორონავირუსის დადასტურებული შემთხვევაა – 130, მათ შორის გამოჯანმრთელებულია – 26, კარანტინის რეჟიმშია – 5 550, ხოლო სტაციონარში მეთვალყურეობის ქვეშ იმყოფება 281 ადამიანი.
