ბათუმში კორონავირუსის ახალი შემთხვევა დადასტურდა. ვირუსით ინფიცირებული ათი წლის ბავშვია.
აჭარის ჯანდაცვის მინისტრის, ზაალ მიქელაძის ინფორმაციით, ბავშვს საფრანგეთში მოგზაურობის ისტორია აქვს. ის ბათუმში ერთ-ერთ სასტუმროში ცხოვრობდა კარანტინის პერიოდში.
“გვაქვს ათი წლის ბავშვის შემთხვევა, რომლის მოგზაურობის ისტორია უკავშირდება ევროპას, კონკრეტულად – საფრანგეთს. ის იმყოფებოდა საკარანტინო ზონაში, ბებიასთან ერთად. მიღებული გადაწყვეტილებით, ვითვალისწინებთ რა ოჯახის თხოვნას, გადაყვანასთან დაკავშირებით, ის გადადის თბილისის ინფექციურ პათოლოგიათა ცენტრში და, შესაბამისად, იქ გააგრძელებს მკურნალობას. ბათუმში ყველანაირი პირობაა იმისათვის, რომ სათანადო მკურნალობა გაეწიოს კორონავირუსით ინფიცირებულებს, უბრალოდ, ეს ოჯახი თბილისიდანაა და ოჯახის თხოვნა გავითვალისწინეთ,” – განაცხადა აჭარის ჯანდაცვის მინისტრმა.
ბავშვი საკარანტინო ზონაში 11 დღის განმავლობაში იმყოფებოდა.
