Batumelebi | შეძლებთ, უარი თქვათ სახელმწიფოს დახმარებაზე და კომუნალურები თავად გადაიხადოთ – სემეკი შეძლებთ, უარი თქვათ სახელმწიფოს დახმარებაზე და კომუნალურები თავად გადაიხადოთ – სემეკი – Batumelebi
RU | GE  

შეძლებთ, უარი თქვათ სახელმწიფოს დახმარებაზე და კომუნალურები თავად გადაიხადოთ – სემეკი

მოქალაქე, რომელსაც ეკუთვნის სახელმწიფო სუბსიდია კომუნალურ გადასახადებზე, შეძლებს ამ შეღავათზე უარი თქვას და გადასახადები თავად გადაუხადოს კომპანიას. სახელმწიფოს მიერ მისთვის გადახდილი თანხა კი, დაბრუნდება ბიუჯეტში.

რა ფორმით მოხდება ეს, როგორც საქართველოს ენერგეტიკისა და წყალმომარაგების მარეგულირებელ ეროვნულ კომისიაში [სემეკი] „ბათუმელებს“ უთხრეს, საკითხზე მუშაობენ.

„შესაძლოა, შეიქმნას სპეციალური ინტერნეტპლატფორმა, სადაც მოქალაქე დააფიქსირებს, რომ ის უარს ამბობს ამა თუ იმ თვის შეღავათზე; შესაძლოა, ეს მოხდეს ცხელი ხაზის მეშვეობით. ამ საკითხებზე ახლა ვმუშაობთ,“ – გვითხრეს სემეკში.

პირველ აპრილს საქართველოს პრემიერ-მინისტრმა განაცხადა, რომ სახელმწიფო მოქალაქეების გარკვეულ კატეგორიას 3 თვის [მარტი, აპრილი, მაისი] კომუნალურ გადასახადებს გადაუხდის.

პრემიერმა ასევე განმარტა, რომ იმ აბონენტების რაოდენობა, რომლებსაც დენზე შეღავათს გაუწევენ, არის 1.2 მილიონი; გაზზე შეღავათები კი, მისივე თქმით, 650 ათას აბონენტს შეეხება.

„ესაა ისეთი კატეგორიის ოჯახები, რომელთაც რეალურად ამ პირობებში ასეთი ტიპის მხარდაჭერა სჭირდებათ. თუმცა, შესაძლოა, აქ იყოს ისეთი ტიპის ოჯახები, რომლებიც ამ დახმარებას არ საჭიროებენ, რომელთაც არ დაუკარგავთ სამსახური და მიუხედავად ყველაფრისა, აქვთ შემოსავალი. რა თქმა უნდა, ასეთი კატეგორიის ოჯახებიც მოხვდნენ ამაში, თუმცა იქნება შესაძლებლობა, რომ ის, ვისაც ამისი საშუალება აქვს და მაღალი სოციალური პასუხისმგებლობიდან გამომდინარე, თავად განაცხადებს უარს სახელმწიფო მხარდაჭერაზე, მას შეეძლება, რომ თავად გადაიხადოს თანხა კომუნალურ კომპანიებში და ამით დაიზოგება ის საბიუჯეტო სახსრები, რომელიც შესაძლოა, მთავრობამ სხვა არანაკლებ პრიორიტეტული მიმართულებების დაფინანსებაზე მიმართოს“,- განაცხადა მედიასთან სემეკის თავმჯდომარემ, დავით ნარმანიამ.

ამ თემაზე:

სოკარი: მარტში ვინც გადაიხადა 114 ლარი და ნაკლები, თანხა შეენახებათ პირად ანგარიშზე

მარტში 36 ლარის ან ნაკლები დენი თუ მოიხმარეთ, სახელმწიფო დაგიფინანსებთ

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com