ბათუმში ინფექციურ საავადმყოფოში 23 პაციენტს აკვირდებიან – ეს ის ადამიანები არიან, რომლებმაც თავად მიმართეს საავადმყოფოს, რადგან აღენიშნებათ რესპირატორული ინფექცია და ეჭვი აქვთ CIVID-19-ზე.
აჭარის ჯანდაცვის სამინისტროს ინფორმაციით, 23-დან შვიდ პირს საეჭვო სიმპტომები აქვს, ამიტომ მათ ლაბორატორიულ ანალიზებს ჩაუტარებენ, ხოლო 16 პირს დააკვირდებიან, საჭიროების შემთვევაში კი მათაც გამოიკვლევენ.
დღეს, 31 მარტს, ბათუმში დაწყებული თერმოსკრინინგის შემდეგ მაღალი ტემპერატურა რამდენიმე პირს აღმოაჩნდა – ამის შესახებ აჭარის პოლიციის უფროსმა განაცხადა. კოტე ანანიაშვილის ინფორმაციით, ამ მოქალაქეებს მისცეს რეკომენდაცია შესაბამისი მედპუნქტებისთვის მიემართათ. არიან თუ არა ამ 23 პაციენტს შორის პირები, რომლებსაც დღეს თერმოსკრინინგის გავლის შემდეგ მაღალი ტემპერატურა დაუფიქსირდათ, ჯერჯერობით უცნობია.
ბათუმში, ამ დროის მონაცემებით [18 სთ], 8 პაციენტს მკურნალობენ კორონავირუსის დადასტურებული დიაგნოზით. ყველა მათგანი ბათუმში, კლინიკა „მედალფაში“ იმყოფება. ორ პაციენტს ორმხრივი პნევმონია აქვს, აქედან ერთის მდგომარეობა მძიმეა, იგი რამდენიმე დღეა ხელოვნურ სუნთქვაზე იმყოფება.
ამავე თემაზე:
რა იკრძალება 31 მარტიდან საქართველოში – კარანტინი და კომენდანტის საათი
