ბათუმში მოქმედი რამდენიმე სავაჭრო ობიექტის მესაკუთრე ამბობს, რომ ისინი ზედამხედველობის სამსახურმა გააფრთხილა, დროებით შეაჩერონ მუშაობა და მაღაზიები დაკეტონ.
„ბათუმელები“ მერიის მუნიციპალურ ინსპექციას დაუკავშირდა.
„ჩვენი თანამშრომლები ქალაქის მასშტაბით აფრთხილებენ ისეთ ობიექტებს, რომლებიც ხალხმრავალ ადგილებად მიიჩნევა, რომ კორონავირუსის გავრცელების პრევენციის მიზნით, მთავრობის რეკომენდაციაა შეაჩერონ მუშაობა. ეს, ასე ვთქვათ, მხოლოდ ამ რეკომენდაციის გადაცემაა მათთვის და არა რაიმე სავალდებულო მოთხოვნა, რომლის არშესრულებასაც შესაძლოა სანქცია მოჰყვეს. უბრალოდ, სასურველია გაითვალისწინონ რეკომენდაცია და შეაჩერონ მუშაობა დროებით. ეს ეხება მაგალითად რესტორნებს, კაფე-ბარებს, მაღაზიებს, გარდა სასურსათო მარკეტებისა,“ – გვითხრეს მუნიციპალურ ინსპექციაში.
საქართველოს მთავრობა აცხადებს, რომ ქვეყანაში კორონავირუსის გავრცელების პრევენციის მიზნით დაწესებული შეზღუდვები კიდევ უფრო გამკაცრდება. შესაბამისი გადაწყვეტილება მთავრობის საკოორდინაციო საბჭოზე დღეს, 19 მარტს, მიიღეს.
ირაკლი ჩიქოვანს, საბჭოს სპიკერს, არ დაუკონკრეტებია რა სახის გამკაცრებაა დაგეგმილი. მისი თქმით, ყველა სამინისტროს მიეცა მითითება, რომ უახლოეს დროში წარმოადგინონ ხედვა, თუ რისი გამკაცრებაა შესაძლებელი სფეროების მიხედვით.
ამ თემაზე:
“ხოფის ბაზრობაზე” მხოლოდ სურსათის ობიექტები იმუშავებენ – COVID-19
