Batumelebi | ბათუმის ავტოსადგური 18 მარტიდან მიკროავტობუსებს აღარ მიიღებს ბათუმის ავტოსადგური 18 მარტიდან მიკროავტობუსებს აღარ მიიღებს – Batumelebi

ბათუმის ავტოსადგური 18 მარტიდან მიკროავტობუსებს აღარ მიიღებს

ბათუმის ავტოსადგური 18 მარტიდან მიკროავტობუსებს თავის ტერიტორიაზე აღარ მიიღებს. ამის შესახებ „ბათუმელებს“ ავტოსადგურის დირექციაში უთხრეს.

„ის მიკროავტობუსები, რომლებიც თბილისიდან, ქუთაისიდან და სხვადასხვა რეგიონიდან არიან შემოსულები, ან დღეს საღამოს და დილით შემოვლენ, დარჩებიან და ხვალ, 18 მარტს გავლენ ავტოსადგურიდან. ეს მიკროავტობუსები კერძო კომპანიების საკუთრებაშია და ჩვენ ყველა მათგანს ვაფრთხილებთ ამის შესახებ. შეიძლება ეს საკითხი უცებ, ერთ დღეში არ მოგვარდეს, თუმცა მზად ვართ, მივყვეთ იმ რეკომენდაციას, რაც გაიცა,“ – გვითხრეს ბათუმის ავტოსადგურში.

__________________

პრემიერ გიორგი გახარიას განცხადებით, 18 მარტიდან დროებით აიკრძალება სამარშრუტო ტაქსები, თუმცა ტრანსპორტის სახედ დარჩება მუნიციპალური ავტობუსები და მეტრო.

მთავრობის გადაწყვეტილებით, ასევე იზღუდება როგორც რეგიონებში, ისე საქალაქთაშორისო სამარშრუტო ტაქსების მოძრაობა.

ქალაქში მიკროავტობუსების მოძრაობას აჩერებს ბათუმის მერიაც – ამის შესახებ დღეს, 17 მარტს, ბათუმის მერმა, ლაშა კომახიძემ ბრიფინგზე განაცხადა. ლაშა კომახიძემ აღნიშნა, რომ სამარშრუტო ტაქსების ჩანაცვლება მოხდება მუნიციპალური ავტობუსებით.

დღესვე ცნობილი გახდა, რომ სამარშრუტო ტაქსების გადაადგილება შეჩერდება აჭარის მუნიციპალიტეტებშიც.

ჯერ არ არის ცნობილი, რა ვადით იზღუდება მიკროავტობუსების მოძრაობა ქვეყნის მასშტაბით.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com