კორონავირუსის საპრევენციო ღონისძიებების ფარგლებში, საქართველოს მთავრობასთან შექმნილი უწყებათაშორისი საკოორდინაციო საბჭო კაფე-ბარებისა და რესტორნების მფლობელებს მომსახურების შეზღუდვის რეკომენდაციას აძლევს.
“რეკომენდაცია მიეცეს კაფეებს, რესტორნებსა და ბარებს, შეზღუდონ მათი მომსახურების ის ნაწილი, რომელიც დაკავშირებულია უშუალოდ მოქალაქეების მომსახურებასთან. მათ ექნებათ საშუალება გააგრძელონ ოპერირება და ფუქციონირება გატანის სერვისებისათვის, თუმცა ჩვენი რეკომენდაციაა, რომ მაქსიმალურად შეიზღუდოს თავშეყრის ადგილები და კონტაქტები,” – განაცხადეს საქართველოს მთავრობის ადმინისტრაციაში გამართულ სპეციალურ ბრიფინგზე დღეს, 16 მარტს.
ქვეყანაში, 16 მარტის მდგომარეობით, კორონავირუსით ინფიცირების 33 შემთხვევაა დაფიქსირებული. კარანტინის რეჟიმში იმყოფება 637 , სტაციონარში მეთვალყურეობის ქვეშ კი 54 ადამიანია.
