თვითიზოლაციის წესის დარღვევის გამო გურიიდან ბათუმში მდებარე საკარანტინო სივრცეში 7 პირი გადაიყვანეს.
ინფორმაცია „ბათუმელებს“ დაავადებათა კონტროლისა და საზოგადოებრივი ჯანმრთელობის ეროვნული ცენტრის გურიის განყოფილების ხელმძღვანელმა არჩილ მჟავიამ დაუდასტურა.
მისივე ინფორმაციით, გურიის სამ მუნიციპალიტეტში, ლანჩხუთში, ჩოხატაურსა და ოზურგეთში სულ 41 პირია თვითიზოლაციაში.
„47 პირი იყო გუშინ. პოლიციამ შეამოწმა და 7 პირი თვითიზოლაციის წესების დარღვევის გამო გვიან ღამით ბათუმის საკარანტინო სივრცეში გადაიყვანეს. ასევე გუშინ დაემატა ერთი პირი თვითიზოლირებულებს. ახლა ჯამში 41 ადამიანია გურიის რეგიონში თვითიზოლაციაში,“ – ამბობს „ბათუმელებთან“ საუბარში არჩილ მჟავია.
თვითიზოლაციის რეკომენდაცია უწყებათაშორისმა საკოორდინაციო საბჭომ ყველა იმ პირის მიმართ გასცა, ვინც მაღალი რისკის მქონე ქვეყნებიდან ბრუნდება საქართველოში. პირები, ვინც ამ წესებს არღვევენ, პოლიციას კარანტინში გადაჰყავს.
15 მარტის მდგომარეობით მაღალი რისკის მქონე ქვეყნებად განსაზღვრულია ჩინეთი, სამხრეთ კორეა, ირანი, იტალია, გერმანია, საფრანგეთი, ესპანეთი, ავსტრია, შვეიცარია, ნორვეგია და დანია.
აღნიშნული ქვეყნებიდან საქართველოში ჩამოსული პირები ვალდებულნი არიან:
- წარმოადგინონ კორონავირუსზე (COVID -19) შემოწმების შესაბამისი ცნობა (სპეციფიკური ლაბორატორიული პოლიმერაზული ჯაჭვური რეაქცია (PCR) კვლევა), რომელიც გაცემული უნდა იყოს გამომგზავრების ქვეყნის შესაბამისი ლაბორატორიის მიერ, ხოლო ტრანზიტულად მგზავრობის შემთხვევაში, ამ სატრანზიტო ქვეყნის შესაბამისი ლაბორატორიის მიერ.
- PCR ცნობის წარმოუდგენლობის შემთხვევაში, გაიარონ შესაბამისი ეპიდემიოლოგიური შემოწმება და შემდეგ, სავალდებულო 14-დღიანი საკარანტინო პროცედურა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მიერ დადგენილი წესით.
