3 მარტს ბათუმში, ბულვარის შესასვლელთან, სასტუმროების ცნობილი ბრენდის, Marriot-ის ხუთვარსკვლავიანი სასტუმრო Le Méridien-ი საზეიმოდ გაიხსნა.
Le Méridien-ი 105 ნომრით, ღია და დახურული აუზებით, სპა და ფიტნესცენტრით, რამდენიმე რესტორნით, ლაუნჯითა და საკონფერენციო დარბაზებით, სტუმრებს უკვე დღეიდან, 3 მარტიდან უმასპინძლებს.
სასტუმრო Le Méridien-ი „ბათუმი თაუერში“ მდებარეობს, რომელიც 2 ნაწილს აერთიანებს. 205 მეტრის სიმაღლის „ბათუმი თაუერი“ ყველაზე მაღალი შენობაა კავკასიაში.
პროექტის ერთი ნაწილი შედგება 35 სართულისგან და მოიცავს როგორც რეზიდენციებს, ასევე სამორინეს. „ბათუმი თაუერის“ 26-ე სართულზე დამონტაჟებულია პანორამული ბორბალი, ამავე სართულზე განთავსდება ლაუნჯ რესტორანიც. კომპლექსი ბათუმის ცენტრში, შავი ზღვის სანაპიროზე მდებარეობს.
საპრეზიდენტო ნომერი Le Méridien-ში
სასტუმრო Le Méridien-ის ინტერიერის დიზაინის კონცეფციაზე ქართულმა კომპანია „რუმსმა“ იმუშავა. პროექტის ფინანსური მხარდამჭერი „თიბისი ბანკია“.
ხედი ერთ-ერთი ნომრის აივნიდან
შეხვედრების ოთახი
გიორგი დარჩიაშვილი – TBC Bank
გიორგი დარჩიაშვილი, TBC ბანკი, კორპორატიული და საინვესტიციო საბანკო მომსახურების დირექტორის მოადგილე:
„მოხარულები ვართ, რომ TBC ბანკის მხარდაჭერით Marriot-ის ბრენდის 5-ვარსკვლავიანი სასტუმრო Le Méridien-ი გაიხსნა. მიგვაჩნია, რომ ეს სასტუმრო თავისი გამორჩეული ინტერიერის დიზაინისა და მაღალი მომსახურების ხარისხით შექმნის ახალ სტანდარტებს რეგიონში. ზოგადად, მინდა აღვნიშნო, რომ TBC-სთვის, დაფინანსების კუთხით, ტურიზმი არის გამორჩეული სექტორი. ჩვენ ვართ ნომერ პირველი მხარდამჭერი ამ სექტორის. ჩვენი სასესხო პორტფელი შეადგენს 800 მილიონ ლარს ტურიზმის მიმართულებით. განსაკუთრებით გამოვარჩევდი რეგიონალურ დაფინანსებას და კერძოდ, აჭარის რეგიონს, სადაც ჩვენი დაფინანსება გაიზარდა 72%-ით 2019 წლის განმავლობაში.
მირიან ქათამაძე, „რედკო“
მირიან ქათამაძე, კომპანია „რედკოს“ დირექტორი:
„ჩვენ ქალაქს დღეიდან დავამატეთ 105 ნომერი და ბათუმის სტუმრებს უკვე შეუძლიათ ისიამოვნონ ჩვენთან დარჩენით, ფრანგული რესტორნებით და ასე შემდეგ. ოფიციალურად Le Méridien-ში დასაქმებულია უკვე 500-ზე მეტი ადამიანი, რაც, ვფიქრობ, რომ მნიშვნელოვანია ბათუმისთვის, რადგან დასაქმებულთა 80% ადგილობრივია. ჩვენი სასტუმრო გამოირჩევა, პირველ რიგში, დიზაინით, რომელიც ქართველმა დიზაინერებმა შექმნეს, ასევე თბილი, ბუტიკის სტილის გარემოთი და რა თქმა უნდა, სერვისით“.
დეველოპერულმა კომპანია „რედკომ “ „ბათუმი თაუერის“ შენობა 25 მილიონ დოლარად შეიძინა. პროექტის ჯამური ღირებულება 80 მილიონი დოლარია. ტრანზაქცია „თიბისისა“ და „რედკოს“ თანამშრომლობით განხორციელდა.
Le Meridien-ის ბრენდი მსოფლიოს 100-ზე მეტ ქვეყანაშია წარმოდგენილი. რაც შეეხება Marriott-ს, მის ქსელში ამჟამად შედიან ისეთი ბრენდების სასტუმროები, როგორებიცაა: The Ritz-Carlton-ი, St. Regis-ი, JW Marriott-ი, Ritz-Carlton Reserve-ი, The Luxury Collection-ი, W Hotels-ი, EDITION-ი, Le Meridien-ი, Marriott Hotels-ი, Sheraton-ი.
