Batumelebi | სასამართლომ გააბათილა დოკუმენტი, რის საფუძველზეც ბათუმში ქიმიურ ტერმინალს აშენებენ სასამართლომ გააბათილა დოკუმენტი, რის საფუძველზეც ბათუმში ქიმიურ ტერმინალს აშენებენ – Batumelebi
RU | GE  

სასამართლომ გააბათილა დოკუმენტი, რის საფუძველზეც ბათუმში ქიმიურ ტერმინალს აშენებენ

„სასამართლომ ბათილად მიიჩნია ის დოკუმენტი, რომლის საფუძველზეც ბათუმში ქიმიური ტერმინალის მშენებლობა დაიწყო“, – აცხადებს საზოგადოებრივი მოძრაობა „ჩემი ბათუმის“ წარმომადგენელი ზაალ ლუხუტაშვილი. მისი ინფორმაციით, თბილისის საქალაქო სასამართლომ 28 თებერვალს დააკმაყოფილა ამ ორგანიზაციის სარჩელი საქართველოს სოფლის მეურნეობის და გარემოს დაცვის სამინისტროს წინააღმდეგ.

„სამინისტრომ გასული წლის 23 იანვარს გამოსცა ე.წ. სკრინინგის დოკუმენტი. ამ დოკუმენტის საფუძველზე ბათუმის მერიამ 12 მარტს გასცა მშენებლობის ნებართვა. ტერმინალის მშენებლობა დაიწყო გარემოზე ზემოქმედების შეფასების გარეშე, რაც არის მიუღებელი და უკანონო… სკრინინგი მხოლოდ ზედაპირული დოკუმენტი იყო, რომელიც ერთ-ერთმა დეპარტამენტმა მოამზადა,“ – გვითხრა ზაალ ლუხუტაშვილმა, რომელიც სასამართლოში „ჩემი ბათუმის“ ინტერესებს იცავდა.

ორგანიზაციას სასამართლოში მოთხოვნილი არ ჰქონდა დაუყოვნებლივი აღსრულება, შესაბამისად, ტერმინალის მშენებლობის შეჩერება მოპასუხეზეა დამოკიდებული – გაასაჩივრებს თუ არა იგი სასამართლოს გადაწყვეტილებას.

„ჩვენთვის უცნობია სასამართლოს დასაბუთება. გადაწყვეტილების დასაბუთების გაცნობის შემდეგ ვიმსჯელებთ და ამის შემდეგ მივიღებთ გადაწყვეტილებას,“ – აღნიშნეს სოფლის და გარემოს დაცვის სამინისტროს პრესცენტრში.

ქიმიური ტერმინალის მშენებლობა ორგანიზაციამ „ჩემი ბათუმი“ გასულ წელს არაერთი აქციით გააპროტესტა.

ნეტგაზეთის მასალების სხვა გამოცემებში გადაბეჭდვის წესი
ავტორი