ქობულეთის სოფელ ციხისძირში მდებარე ყოფილი რუსული სკოლის შენობას კულტურული მემკვიდრეობის უძრავი ძეგლის სტატუსი მიენიჭა. საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის შესაბამისი ბრძანება 2020 წლის 17 თებერვალს შევიდა ძალაში.
ციხისძირი, ყოფილი რუსული სკოლის შენობა / ფოტო: სააგენტო
ბრძანების მიხედვით, ყოფილი რუსული სკოლის შენობა, რომელიც სოფელ ციხისძირში მდებარეობს, კულტურული მემკვიდრეობის თვალსაზრისით [არქიტექტურულად] ღირებულ ობიექტად ჩაითვალა. შენობა XX საუკუნის დასაწყისშია აგებული.
ნაკვეთი [3303 კვ.მ ფართობის ტერიტორია], სადაც ეს შენობა მდებარეობს, სახელმწიფომ, პირობებით, 2018 წელს კერძო პირს მიჰყიდა.
სააგენტოს გენერალური დირექტორის ამავე ბრძანებით, კულტურული მემკვიდრეობის უძრავი ძეგლის სტატუსი მიენიჭა ასევე აკაკი შანიძის სახლ-მუზეუმს [სამტრედია, სოფელი ქვედა ნოღა], საცხოვრებელ სახლს [თელავში] და ღვთისმშობლის ეკლესიას [ქ. ახმეტის სამხრეთ-აღმოსავლეთით, ადგილი „საბერო“].
აკაკი შანიძის სახლ-მუზეუმი / ფოტო: სააგენტო
