Batumelebi | ბათუმში უპატრონო ცხოველებზე შეტყობინებების რაოდენობა გაზრდილია – მერია ბათუმში უპატრონო ცხოველებზე შეტყობინებების რაოდენობა გაზრდილია – მერია – Batumelebi

ბათუმში უპატრონო ცხოველებზე შეტყობინებების რაოდენობა გაზრდილია – მერია

ბათუმის მერიის მიერ უპატრონო შინაური ცხოველების მოვლა-პატრონობისა და პოპულაციის რეგულირებაზე გამოცხადებული ტენდერები არ შედგა. ქუჩის ცხოველებზე მიმდინარე წლის იანვრიდან არავინ ზრუნავს, შესაბამისად, მერიამ გადაწყვიტა ორი თვის მომსახურება ტენდერის გარეშე შეისყიდოს, რისთვისაც 58 950 ლარის დახარჯვას გეგმავს. ამ პერიოდში კი, ტენდერს მესამედ გამოაცხადებს [უკვე აპრილიდან დეკემბრის ჩათვლით მომსახურების შესყიდვაზე].

პირველ ორ არშემდგარ ტენდერში თანხა 252 ათასი ლარი იყო გათვალისწინებული. ბიუჯეტში ცვლილების შემდეგ კი, ეს თანხა ჯამში 314 ათას ლარამდე გაიზრდება.

„საქართველოს მთავრობის განკარგულების პროექტის „ცოფის პრევენციის მიზნით 2019-2023 წლებში გასატარებელი ღონისძიებების შესახებ“ შესაბამისად, სურსათის ეროვნულ სააგენტოს აღნიშნული წლების განმავლობაში უნდა განეხორციელებინა როგორც პატრონიანი, ასევე თავშესაფარში განთავსებული შინაური ცხოველების [ძაღლი, კატა] ვაქცინაცია. ამის გამო მოხდა ერთეულის ფასის დაწევა 90 ლარიდან 80 ლარამდე და ელექტრონული ტენდერები გამოცხადდა ჯამში 252 ათასი ლარით… თუმცა, შემდგომ ვაქცინაციის ჩატარების პრერორგატივა გადმოეცა ისევ თვითმმართველობას და აქედან გამომდინარე აუცილებლობას წარმოადგენს კვლავ ვაქცინაციის თანხის გათვალისწინება და ერთეულის ფასის გაზრდა 10 ლარით – 90 ლარამდე [მომსახურებაში შედის ქალაქის ტერიტორიიდან უმეთვალყურეო, უპატრონო შინაური ბინადარი ცხოველების [ძაღლი, კატა] დაჭერა და ტრანსპორტირება, სტერილიზაცია, კასტრაცია, კვება, ვაქცინაციასთან დაკავშირებული პროცედურები, ტრავმირებული ცხოველის მკურნალობა , მათ შორის ოპერაციული მკურნალობა,“ – აცხადებს ბათუმის მერია.

მერიის ინფორმაციით, „ამ ეტაპისათვის გაზრდილია უპატრონო ცხოველებზე შეტყობინებების რაოდენობა“, რის გამოც მიზანშეწონილად მიაჩნია ბიუჯეტში ცვლილებების შეტანამდე განხორციელდეს პირდაპირი წესით ხელშეკრულების გაფორმება ორი თვის ვადით.

„რამდენადაც მიმდინარე ეტაპზე ბათუმში გაზრდილია ტურისტული ნაკადი, უპატრონო ცხოველების მოვლა-პატრონობის ღონისძიების შეუფერხებლად განხორციელება [ვაქცინაცია, სტერილიზაცია, დაბირკვა] წარმოადგენს უმოკლეს ვადაში გასატარებელ ღონისძიებას,“ – აცხადებს მერია.

მერიის განაცხადი 2 თვის მომსახურების პირდაპირი წესით შესყიდვაზე, შესყიდვების სააგენტომ 12 თებერვლამდე უნდა განიხილოს.

ამ თემაზე:

ვინ მოუვლის ქუჩის ძაღლებს ბათუმში? – ტენდერი მეორედ ჩავარდა

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com