Batumelebi | თოვლის გამო მცირე მეწყერი განვითარდა სოფელ ბუთურაულში თოვლის გამო მცირე მეწყერი განვითარდა სოფელ ბუთურაულში – Batumelebi
RU | GE  

თოვლის გამო მცირე მეწყერი განვითარდა სოფელ ბუთურაულში

აჭარის მაღალმთიანეთში გუშინ მოსული უხვი ნალექის შედეგად მცირე მეწყერი განვითარდა შუახევის სოფელ ბუთურაულში. შოთა მახაჭაძისა და დავით დიასამიძის საცხოვრებელ სახლებთან ახლოს მიწის მასა ჩამოიშალა.

შუახევის მერიის ინფორმაციით, სტიქიის კერას გეოლოგები შეისწავლიან, საჭიროების შემთხვევაში, ოჯახებს გაიყვანენ ქირით.

დღეს შუახევში გამოიდარა. მაღალი ზონის სოფლებში ახალი თოვლის საფარი 50-სმ აჭარბებს. შუა ზონაში 20-30 სმ-ია, ხოლო დაბაში 5-სმ.

ელექტროენერგია დილიდან ნაწილობრივ არ მიეწოდება შუბნის და წყალსაყრის ადმინისტრაციული ერთეულების რამდენიმე სოფელს. ბარათაულში ელექტროენერგიის მიწოდება აღდგა. შუახევის პრესსამსახურის ინფორმაციით, აღნიშნული დასახლების აბონენტებს ელექტროენერგია დაახლოებით ერთ საათში აღუდგება.

გზების გაწმენდითი სამუშაოები მიმდინარეობს:
გომარდულის, ჯაბნიძეების, შუახევი-უჩამბის, კარაპეტის, ლომანაურის,ხიჭაური-ნაღვარევის, წყაროთის, ჭვანა- გომარდულის, ბრილის, ინწკირვეთის, წელათის, ნენია – ბუთურაულის, ფურტიოს, გოგაძეების, პაპოშვილები – გორის, დაბაძველის მიმართულებით. მუშაობს აჭარის საგზაო დეპარტამენტის 18 ერთეული და მერიის 1 ერთეული ტექნიკა.

მერიაში საგანგებო სიტუაციების მართვის შტაბი მუშაობს 24-საათიან რეჟიმში. მოქმედებს ცხელი ხაზი: 08 000 000 08.

 

4 თებერვალს მეწყერი განვითარდა ქედაში, სოფელ ზენდიდში, ბერიძეების საცხოვრებელთანაც. 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან