ქობულეთში 9 აპრილის მემორიალი მერიაში მომზადებული ესკიზით მოეწყობა

ქობულეთში არსებულ 9 აპრილის სკვერში მემორიალი მოეწყობა. 9 აპრილის მემორიალის მოწყობას ქობულეთის მერია იმ ესკიზის მიხედვით გეგმავს, რომელიც მერიის არქიტექტურისა და სივრცითი მოწყობის სამსახურში მოამზადეს.

როგორც „ბათუმელებმა“ გაარკვია, ესკიზის შექმნაზე მერიას კონკურსი არ გამოუცხადებია. მემორიალის მოწყობაზე კი, 23 625 ლარად, ტენდერია გამოცხადებული.

სატენდერო კომისიის ერთ-ერთ ოქმში აღნიშნულია, რომ მემორიალის მოწყობის სამუშაოები აჭარის ავტონომიური რესპუბლიკის ბიუჯეტიდან დაფინანსდება.

ტენდერში წინადადებების მიღება 2020 წლის 30 იანვარს დაიწყება და 4 თებერვალს დასრულდება.

მემორიალის მოწყობა, ტენდერში გამარჯვებულთან ხელშეკრულების დადების დღიდან, 2020 წლის 5 აპრილამდე უნდა დასრულდეს.

9 აპრილის მემორიალის ესკიზი, რომელიც ქობულეთის მერიაში მომზადდა და რომლის მიხედვითაც მემორიალი ქობულეთში, 9 აპრილის სკვერში უნდა მოეწყოს / ფოტო სატენდერო დოკუმენტებიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com