აქტივისტების ბრახუნით პროტესტს „რივიერას“ დაცვამ აგრესიულად უპასუხა


„მწვანე მომავალი“ ეძებს მწვანე მომავლისთვის მებრძოლ ხალხს, რომლებიც ჩვენთან ერთად იბრძოლებენ ბათუმი რივიერასა და სხვა საჯარო სივრცეების გადასარჩენად!“, – ამ გზავნილით აგროვებენ ფეისბუქზე მხარდამჭერებს მწვანე მომავლის წევრები, რომლებიც დღეს „ბათუმი რივიერას“ ლითონის მაღლივ ღობეზე აბრახუნებდნენ და კარების გახსნას ითხოვდნენ.

აქტივისტების ხელებით ბრახუნის საპასუხოდ ღობის შიგნიდან მძიმე საგნები ისროლეს.

აქტივისტები აცხადებენ, რომ მათ აუცილებლად უნდა გაიგონ, რა სამუშაოებს ატარებს კომპანია „ბათუმი რივიერა“ ბათუმის კონცხზე.

აქტივისტების თქმით, კომპანიას არ აქვს ნებართვა, მაგრამ ამის მიუხედავად 24 საათი არ ჩერდება და ატარებს სამუშაოებს, სახელმწიფო კი ამაზე არ რეაგირებს.

აქტივისტები ამბობენ, რომ ისინი გაჩერებას არ აპირებენ და არც ხელისუფლებას, არც კომპანიას არ მისცემენ იმის საშუალებას, რომ „ზღვასთან მიმავალი ეს ერთადერთი ღია სივრცე ჩაკეტონ“.

„ეს [ადგილი] არის საზოგადოების მაღალი ინტერესის საგანი და უნდა იყოს ღია, უნდა ვხედავდეთ, რა ხდება შიგნით. ვიცით, რომ ტარდება კვლევები, თუმცა რა კვლევებია და ვინ არიან ჩართულები, ჩვენ არ ვიცით. როგორც საჯარო უწყებებმა, ისე კერძო კომპანიამ დახურეს ეს კარები და ვითხოვთ ეს კარები გაიღოს, რომ ვიცოდეთ რა ხდება შიგნით“, – ამბობს სამოქალაქო აქტივისტი ნათია აფხაზავა.

„ბათუმი რივიერა“ ბათუმის კონცხზე 6 ცათამბჯენის აშენებას გეგმავს. მშენებლობაზე ნებართვა საქართველოს ეკონომიკის სამინისტრომ უნდა გასცეს. სახელმწიფოს ეს ნებართვა, ჯერჯერობით, არ გაუცია.

ბათუმი, „რივიერა“ / 14.01.2020

ბათუმი, „რივიერა“ / 14.01.2020

ბათუმი, „რივიერა“ / 14.01.2020

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან