Batumelebi | „უფროსების უფროსები“ – რა სტრუქტურას ქმნის აჭარის მაუწყებელი და რა ელით ჟურნალისტებს „უფროსების უფროსები“ – რა სტრუქტურას ქმნის აჭარის მაუწყებელი და რა ელით ჟურნალისტებს – Batumelebi
RU | GE  

„უფროსების უფროსები“ – რა სტრუქტურას ქმნის აჭარის მაუწყებელი და რა ელით ჟურნალისტებს

ახალი მენეჯმენტის მიმართ კრიტიკულად განწყობილ ჟურნალისტებს მიაჩნიათ, რომ მათი სამსახურიდან გაშვება უკვე დროის ამბავია. მაუწყებლის მრჩეველთა საბჭოს სხდომაზე, გუშინ, 10 იანვარს მაუწყებლის თანამშრომლების ნაწილს გააცნეს დოკუმენტი, რომელსაც მაუწყებლის ჟურნალისტები პირად საუბარში აფასებენ, როგორც „ტელევიზიის დანგრევას“. რა წერია დებულების ცვლილების პროექტში და რის შეცვლას აპირებს ახალი მენეჯმენტი? – „ბათუმელები“ მაუწყებლის მრჩეველთა საბჭოს ერთ-ერთ წევრს, გია ქარცივაძეს ესაუბრა.

  • გია, გვითხარით, რა იცვლება აჭარის მაუწყებლის დებულებაში, როგორი სტრუქტურა ყალიბდება და რამდენად სწორია შეფასება, რომ ეს დოკუმენტი „ტელევიზიას დაანგრევს“?

გუშინდელ შეხვედრზე საუბარი იყო იმ დოკუმენტზე, რომელიც 25 დეკემბერს სხდომაზე ჰქონდათ გატანილი განსახილველად და ვერ მიიღეს –  ერთმა მრჩეველმა ჩააგდო. ახლა ხვდებიან შტატიან თანამშრომლებს, თითქოს მათ, ვისაც რეორგანიზაცია შეეხება. მაგრამ თუ ეს დებულება იმ სახით დამტკიცდა, რაც ახლა არის, შეეხება ფაქტობრივად ყველა.

მე გუშინ სხდომას სრულად ვერ დავაკვირდი, მაგრამ რაც თვალში მომხვდა და, ჩემი აზრით, ყველაზე საშიშია, ვებგვერდის სამსახურს პრაქტიკულად აუქმებენ. იგივე ფორმაში აბრუნებენ, რაც ადრე იყო, ანუ არქივის სამსახური იქნება, რომელსაც მხოლოდ შენახვა დაევალება.

მაუწყებელს აქვს ასეთი გამოცდილება – დამოუკიდებელი ვებგვერდის შექმნის შემდეგ გაიზარდა ნახვები, მოიპოვა პოპულარობა. ვებგვერდს უფრო მეტი მომხმარებელი ჰყავს, ვიდრე სატელევიზიო ეთერს, რასაც აჩვენებს სტატისტიკა – ახლო პერიოდში დაახლოებით 100 ერთეულით და  მეტით აქვს მატება. შესაბამისად, ამის გაკეთება წარმოუდგენელია. ისეთი შთაბეჭდილება დამრჩა, რომ ვერ ხვდებიან რას აკეთებენ, შეგნებულად ამის გაკეთება წარმოუდგენელია.

  • როგორ ასაბუთებენ ამ ცვლილების აუცილებლობას?

დასაბუთებაც არარელევანტურია – რომელიღაც პროდიუსერს მოუნდა თავისი გადაცემა აეტვირთა და ვებგვერდმა უარი უთხრაო. ვებგვერდი პოპულარულ თემებს რომ ანთავსებს, დამოუკიდებლად ამზადებენ მასალებს, აი ამაში ვერ ერკვევიან. ვებგვერდი წარმოუდგენიათ როგორც ციფრული არქივი და მიმდინარე ინფორმაციის განთავსება-შენახვის ადგილი. თურმე, ვიღაცის ანონსი არ ყოფილა ვებგვერდზე, რომელიღაც გადაცემის პოპულარიზაცია არ გაუკეთებია…

თავის დროზე სხვა შინაარსის გამო გამოიყო ვებგვერდი და არ იმის გამო, რომ ის ყოფილიყო ციფრული არქივი. მე მათ ვუთხარი, რომ ამის გაკეთება არ შეიძლება. ისინი ამტკიცებენ, რომ ვებგვერდი უნდა ემსახურებოდეს მაუწყებელს, ეს ცხადია ასეა, მაგრამ ვებგვერდი 100 პროცენტით მაუწყებელს ვერ მოემსახურება – გადაცემები, რომლებიც არაა პირველ გვერდზე გამოსატანი, ვერ გამოიტანა. ეს სარედაქციო დამოუკიდებლობის საკითხია, გადაწყვიტოს რომელი თემაა დღეს პოპულარული, რომელი უნდა იყოს პირველ ადგილზე ან მეორეზე… ხელმძღვანელის, პროდიუსერის მითითება, რომელიღაცა გადაცემის ავტორის თხოვნა, რომ დამიდე ვებგვერდზე… ასეთი რამ არ ხდება.

ჩვენ გვქონდა პრაქტიკა, რომელი გადაცემა უნდა ყოფილიყო პირველ გვერდზე ან რა არ უნდა ყოფილიყო საერთოდ. სწორედ ამის გამო შეიქმნა ცალკე სტრუქტურული ერთეული და ახლა ამ სტრუქტურის გაქრობა უნდათ. თუ  ეს ასე მოხდა, ჩვენ მივიღებთ არქივის სამსახურს, რომელიც ინახავს მასალებს და მას მესამე პირები ვერ ხედავენ.

  • კიდევ რის შეცვლას აპირებენ, როგორც ვიცით, ახალი თანამდებობებიც იქმნება?

კი. სამსახურის უფროსებს კიდევ უმატებენ უფროსებს. ხუთი ახალი თანამდებობა იქმნება, ან დირექტორის მოადგილეები დაერქმევა, ან… სახელს რა მნიშვნელობა აქვს. რაღაცების უფროსები იქნებიან. მაგალითად, რეპორტიორს ახალი ამბების სამსახურში ეყოლება მინიმუმ 4 უფროსი. დღეს თუ ჰყავს რედაქტორი და სამსახურის ხელმძღვანელი, მერე ეყოლება უფროსების უფროსი, რომელიც უშუალოდ დაექვემდებარება დირექტორს. ანუ მმართველი რგოლი იზრდება. უფროსის უფროსს ხელფასი ხომ უნდა მისცე, ეს ბიუჯეტური გათვლაც არ არის. მიზანი რაა, რატომ გვჭირდება უფროსებთან დამატებით საშუამავლო რგოლი? – ეს ვერ გავიგე გუშინდელ შეხვედრაზე.

მიზნებს თუ სწორად ვხედავ, ეს ცვლილება ყველა სამსახურის პრობლემა იქნება და, რა თქმა უნდა, შეეხება რედაქტორებს, პროდიუსერებს და სამსახურის უფროსებს. შეუძლიათ თქვან, რომ ჩვენ არ გვჭირდება ამდენი პროდიუსერი ან სამსახურის უფროსი, გვჭირდება ამდენი და მას რომ უფროსი ჰყავს, ის დაეხმარება 9-იანის გამოშვების მომზადებაში. როცა  ერთ რეპორტიორს 9 უფროსი ეყოლება, იქ მოქმედი რედაქტორი საჭირო აღარ იქნება.

ზოგადად, ნიუსრუმიც აღარ იქნება. იქნება ვების, რადიოს და ახალი ამბების გაერთიანებული სამსახური. ახალი ამბების სამსახურის რეპორტიორი იმუშავებს სამივე პლატფორმაზე. საფრთხე, რომ რადიო და ვების მიმართულება უერთდება რეპორტიორს…. არ ვიცი სამსახურების ასე გამსხვილების პირობებში, რამდენად შესაძლებელია მუშაობა. თან ფინანსური გათვლა არ არსებობს. სამუშაოს როცა უმატებ ადამიანებს, ხელფასებიც ხომ უნდა დაემატოს. ეს ფინანსები საიდან მოაქვთ არ ვიცი.

გარდა ამისა, ამ ადამიანების შესარჩევად კონკურსი უნდა გამოცხადდეს.

  • თქვენ ამბობთ, რომ ახალი სტრუქტურა შეეხება ყველას. ეს ხომ არ ნიშნავს იმას, რომ დაანონსებული კონკურსები იმ ჟურნალისტებს დატოვებს ტელევიზიის მიღმა, რომლებიც ახალი ხელმძღვანელობის მიმართ კრიტიკულად არიან განწყობილი?

თუ სტრუქტურა დამტკიცდა და დამსაქმებელს სურვილი ექნება, რომ ეს შეეხოს, შეეხება ყველას. თუ სურვილი ექნება, რომ შერჩევით შეეხოს ვიღაცებს, შერჩევითაც შეახებს. სიმართლე გითხრათ, გუშინდელი შეხვედრა მიმართული იყო, მაგალითად, სოფო ჟღენტის [მაუწყებლის ვებგვერდის რედაქტორი] წინააღმდეგ. ცალკეული სუბიექტების გამო სამსახური გააუქმო, ეს არ არის ნორმალური. თუ სუბიექტი რაიმეს არღვევს, არის წესები და წესზე უნდა მიუთითო, უნდა დაიწყო დისციპლინური წარმოება. თუ არ არღვევს და შენ რაღაც არ მოგწონს, ეს არ არის ნორმალური მმართველობითი დამოკიდებულება.

  • ვიცი, რომ საინფორმაციო სამსახური წინააღმდეგია ამ ცვლილებების. რამდენად ელით, რომ გუნდის მოსაზრებებს მენეჯმენტი გაიზიარებს?

გუშინ, მაგალითად, საკმაოდ კვალიფიციური კითხვები ჰქონდა მაიას [მაია მერკვილაძე, საინფორმაციო სამსახურის უფროსის მოადგილე], რაზეც პასუხები ვერ მივიღეთ. მაიას კითხვებს მოჰყვებოდა არაწარმდგენი პირების კონფლიქტი მასთან: მაიას ეუბნებოდნენ – შენ რომ ასე ამბობდი, ისე ამბობდი… გადაიზარდა კონფლიქტში, რამაც დაკარგა განხილვის ეფექტი.

მაიას, მაგალითად, აინტერესებდა, რატომ ჩაირთო აჭარის მაუწყებლის ფეისბუქზე ლაივი ვების სამსახურის მიღმა. ამაზე პასუხი ვერ გასცეს. რამდენიმე დღის წინ ტელევიზიის ოფიციალურ ფეისბუქგვერდზე, თუ არ ვცდები პრემიერ-მინისტრის გამოსვლის ლაივი ისე ჩაირთო, რომ ეს არავინ იცოდა. მან ასევე იკითხა, რა პრეტენზიები ჰქონდათ ვებგვერდთან დაკავშირებით, მაგრამ პასუხი ვერც ამაზე მიიღო.

  • რას ფიქრობთ, შეძლებს ამ დოკუმენტის დამტკიცებას ახალი მენეჯმენტი?

დოკუმენტის შეთანხმებას 4 ხმა სჭირდება. შემდეგ ის საზოგადოებრივი მაუწყებლის მრჩეველთა საბჭომ უნდა დაამტკიცოს.

გუშინ საბჭოს ყველა წევრი არ მონაწილეობდა დოკუმენტის წარდგენაში. დოკუმენტი  მრჩეველთა საბჭოს სხდომაზე წარადგინა დირექტორის თანაშემწე. მას მრჩეველთა საბჭოს წევრი სოსო სტურუა ეხმარებოდა. სხდომას ესწრებოდა თამილა დოლიძეც, მაგრამ ის უფრო ფასილიტატორი იყო.

  • 25 დეკემბრის განხილვაზე საბჭოს წევრმა თამარ წილოსანმა ამ დოკუმენტს მხარი არ დაუჭირა, თქვენ ახლა აგირჩიეს და კრიტიკულად ხართ განწყობილი. შეიძლება მაინც ველოდოთ, რომ დოკუმენტს დაამტკიცებენ?

დოკუმენტი თუ არ იქნება მაუწყებლის განვითარებისკენ მიმართული, მე, პირადად, მხარს არ დავუჭერ. თამარ წილოსანსაც აქვს კითხვები, მაგრამ რას გადაწყვეტს ვერ გეტყვით.

  • განხილვის დასრულებას როდისთვის აპირებენ?

15 იანვრამდე უნდათ მოასწრონ შეხვედრა საშტატო თანამშრომლებთან, მაგრამ ეს არ არის ნორმალური, რადგან დოკუმენტი ყველას ეხება. 15-ში სხდომა აქვთ ჩანიშნული, დღის წესრიგში დებულების პროექტი არ არის შეტანილი, მაგრამ შეიძლება ისე მოხდეს, რომ „სხვადასხვაში“ აღმოჩნდეს.

მე მექნება კომუნიკაცია პირველი არხის სამეურვეო საბჭოსთან. თუ არ შეიცვალა და ეს დოკუმენტი ამ სახით მიიღეს, აუცილებლად გავასაჩივრებ სასამართლოში.

  • ჟურნალისტებს რომ დავანებოთ თავი, ზოგადად, სხვა თანამშრომლების განწყობა როგორია ამ დოკუმენტთან დაკავშირებით? 

იშვიათი გამონაკლისების გარდა, შინაარსს ვერავინ ხვდება. არსებითი პრობლემაა ის, რომ მაუწყებლის სტრუქტურული ერთეულები არ არიან ამაში ჩართული, მაუწყებლის იურიდიული  მხარდაჭერის სამსახურმაც კი არ იცის, რა ხდება. მიუხედავად იმისა, რომ არსებული სტრუქტურის შექმნაში ვიღებდი მონაწილეობას, სიმართლე გითხრათ, ბოლომდე ვერც მე ვხვდები, რას აკეთებენ.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან