ახალი რეგულაციით, 2020 წლის პირველი აპრილიდან, ავტომანქანები 10 წელზე მეტი ხანდაზმულობის საბურავებით პერიოდულ ტექნიკურ ინსპექტირებას ვეღარ გაივლიან.
ამასთან, მარჯვენასაჭიანი ავტომანქანა, რომელიც პირველი აპრილიდან გაივლის ტექდათვალიერებას [მარჯვენა საჭით], მომდევნო ტექდათვალიერებას ვერ გაივლის, თუ საჭე შეცვლილი ექნება. რაც შეეხება 2020 წლის პირველ აპრილამდე საჭეშეცვლილ ავტომანქანებს, ისინი ტექდათვალიერებას უპრობლემოდ გაივლიან.
აღნიშნული ცვლილებების შესახებ ეკონომიკისა და მდგრადი განვითარების სამინისტროს, სახმელეთო ტრანსპორტის სააგენტოს უფროსმა შალვა ურიადმყოფელმა განაცხადა.
მისივე თქმით, „იმ ავტოსატრანსპორტო საშუალებებზე, რომლებიც იმპორტირებული იქნება მარჯვენა საჭით, მძღოლებმა უნდა შეინარჩუნონ მისი მდებარეობა, წინააღმდეგ შემთხვევაში, პირველი აპრილის შემდეგ საჭეგადატანილი ავტომობილები პერიოდულ ტექნიკურ ინსპექტირებას ვერ გაივლიან“.
