მთავრობა ქობულეთის რკინიგზის სადგურთან დასახლებულ ნაკვეთს და 19 შენობას ყიდის

აჭარის მთავრობა ქობულეთის რკინიგზის სადგურის მიმდებარედ ყიდის 19 შენობას, სადაც ამ დრომდე მოქალაქეებს სავაჭრო ჯიხურები აქვთ მოწყობილი. ქონების გასხვისების შემდეგ ისინი შემოსავლის ამ წყაროს დაკარგავენ. მათთან მოლაპარაკება მთავრობას აუქციონის პირობებს შორის არ ჩაუწერია, მიუხედავად იმისა, რომ ქონების მომავალმა მესაკუთრემ აქ დიდი სავაჭრო ცენტრი უნდა ააშენოს [ეს აუქციონის მთავარი პირობაა]. სამინისტროში მიიჩნევენ, რომ ახალ სავაჭრო ცენტრში ამ მოქალაქეებისთვის ფართობების გამოყოფა, უკვე შემძენსა და მათ შორის მოლაპარაკების საგანი შეიძლება გახდეს კიდევაც, თუმცა ამაში სამინისტრო ვერ ჩაერევა.

მთავრობის საკუთრებაში არსებული ეს შენობები მოქალაქეებს თვითნებურად დაკავებული არ აქვთ, მათ საიჯარო ხელშეკრულებები ჰქონდათ გაფორმებული აჭარის ფინანსთა და ეკონომიკის სამინისტროსთან. როგორც სამინისტროში აცხადებენ, ამ ხელშეკრულებებს ვადა გაუვიდა.

2019 წლის 10 დეკემბერს გამოცხადებული ელექტრონული აუქციონით აჭარის მთავრობა ქობულეთში, რკინიგზის სადგურის მიმდებარე ტერიტორიაზე, 4 261 კვადრატულ მეტრ მიწის ნაკვეთს, მასზე დამაგრებულ შენობა-ნაგებობებთან ერთად პირობიანი აუქციონით ყიდის. რეესტრის მონაცემებით, ამ ტერიტორიაზე მცირე მასშტაბის სულ 19 შენობაა.

აუქციონის პირობის მიხედვით, ტერიტორიაზე ინვესტორი სავაჭრო ცენტრს ააშენებს, რაშიც არანაკლებ 1 მილიონი ლარის ინვესტიცია უნდა განახორციელოს. მთავრობა ინვესტორს ავალდებულებს ასევე შენობის წინასწარ განსაზღვრული პროფილი ათი წლის განმავლობაში შეინარჩუნოს.

ქონების საწყისი ფასი 1 მილიონ 50 000 ლარია, ბიჯი – 25 000 ლარი. აუქციონი 2019 წლის 30 დეკემბერს უნდა დასრულდეს.

ნეტგაზეთის მასალების სხვა გამოცემებში გადაბეჭდვის წესი
ავტორი