საზმაუს ახალი შენობის აშენებას 77,2 მილიონი ლარი დასჭირდება


საზოგადოებრივი მაუწყებლის ინფორმაციით, მაუწყებლის ახალი შენობის და დამხმარე შენობა-ნაგებობების სახარჯთაღრიცხვო ღირებულება 77 232 427 ლარია. ახალი შენობა თბილისში, ანნა პოლიტკოვსკაიას ქ. N31-ში აშენდება. მაუწყებელს სამშენებლო სამუშაოების შესყიდვაზე ტენდერი ჯერ არ გამოუცხადებია.

საზოგადოებრივი მაუწყებელი ამ ეტაპზე ახალი შენობის სამშენებლო სამუშაოების ზედამხედველობასთან დაკავშირებულ საკონსულტაციო მომსახურების ფასის დასადგენად ბაზარს იკვლევს.

„საკონსულტაციო მომსახურება ითვალისწინებს სამშენებლო სამუშაოებზე განხორციელებულ ყოველდღიურ ზედამხედველობას და პროექტის მართვას. მშენებლობაზე განხორციელებული ზედამხედველობის ძირითადი მიზანია, უზრუნველყოფილ იქნეს სამშენებლო სამუშაოების უმაღლესი ხარისხით შესრულება, სამშენებლო ხელშეკრულებით გათვალისწინებული სპეციფიკაციებისა და პროექტის მოთხოვნების სრული დაცვით, რაც თავის მხრივ, იქნება ობიექტის ეფექტური ფუნქციონირების გარანტი გრძელვადიან პერიოდში“, – აღნიშნულია ტექნიკურ დავალებაში.

ამავე დოკუმენტის მიხედვით, საზოგადოებრივი მაუწყებლის ახალი შენობა ითვალისწინებს 24 782 კვ/მ ფართობის შენობის მშენებლობას; სამშენებლო სამუშაოებისათვის განკუთვნილი პერიოდია 36 თვე, ხოლო ხარვეზების გამოსწორების ვადა – 12 თვე.

– – –

ახალი შენობის დაპროექტებაზე საზოგადოებრივმა მაუწყებელმა ხელშეკრულება კონკურსში გამარჯვებულ შპს „თბილქალაქპროექტთან“ 2017 წლის 6 ნოემბერს გააფორმა 1 179 998 ლარზე [დღგ-ს ჩათვლით].

ამ ხელშეკრულებით ახალი შენობა თბილისში, მ. კოსტავას ქ. N68-ში, უნდა დაპროექტებულიყო, თუმცა 2018 წლის 6 მარტს ხელშეკრულება შეიცვალა. შეიცვალა ახალი შენობის ასაშენებელი ადგილი და გაიზარდა სახელშეკრულებო თანხაც.

ახალი შეთანხმებით, შენობა ანნა პოლიტკოვსკაიას ქ. N31-ში დაპროექტდებოდა, სახელშეკრულებო თანხა კი, 1 265 557 ლარით განისაზღვრა.

შესყიდვების პორტალის მიხედვით, ამ დროისთვის [2019 წლის 3 დეკემბერი], საზმაუს კომპანიისთვის ჯამში 1 092 778 ლარი აქვს გადახდილი.

2 წლის წინ საზმაუში აცხადებდნენ, რომ მშენებლობაზე ტენდერი 6-7 თვეში გამოცხადდებოდა და მშენებლობა 2020 წლისთვის დასრულდებოდა. ტენდერი ამ დრომდე არ არის გამოცხადებული, მშენებლობას კი 3 წელი დასჭირდება.

„პირველი არხი კოსტავას ქუჩაზე არსებული ქონების გასხვისების შედეგად მიღებულ თანხას გამოიყენებს ახალი შენობისა და ტექნიკური გადაიარაღებისთვის“, – აცხადებდა პირველი არხი.

 

მთავარი ფოტო: საზოგადოებრივი მაუწყებლის ახალი შენობის დიზაინი. ფოტო: „თბილქალაქპროექტი“

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com