განათლების მინისტრმა 3 ახალი მოადგილე დანიშნა, ჩხენკელს სულ 7 მოადგილე ჰყავს


საქართველოს განათლების მინისტრს სამი ახალი მოადგილე ჰყავს. მინისტრის მოადგილის თანამდებობას ეკატერინე დგებუაძე დაიკავებს, რომელიც სამინისტროში ინკლუზიური განვითარების სამმართველოს ხელმძღვანელობდა.

მინისტრის მოადგილე იქნება თამარ ქიტიაშვილიც, რომელიც საქართველოში გაეროს განვითარების პროგრამის (UNDP Georgia) მრჩეველი იყო პროფესიული განათლების საკითხებში და ნუნუ მიცკევიჩი, რომელიც თბილისის სახელმწიფო უნივერსიტეტის ასოცირებული პროფესორია.

სამინისტროს ინფორმაციით, მინისტრის პირველი მოადგილე კვლავ ირინა აბულაძე იქნება. მინისტრის მოადგილეებად დარჩებიან ბადრი მაისურაძე, ლევან ხარატიშვილი და შალვა გოგოლაძეც.

მიხეილ ჩხენკელი განათლების მინისტრად 13 ნოემბერს მეორედ დანიშნეს. ყოფილმა მინისტრმა მიხეილ ბატიაშვილმა კი თანამდებობა საკუთარი სურვილით დატოვა.

მიხეილ ჩხენკელი ამ თანამდებობაზე პირველად მხოლოდ რვა თვის განმავლობაში მუშაობდა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com