დღეს, პრაქტიკოსი მასწავლებლებისა და მასწავლებლობის მსურველების კომპეტენციის დადასტურების გამოცდები დაიწყო. ბათუმში ორი საგამოცდო ცენტრია გახსნილი პირველ და მეათე საჯარო სკოლებში. ამ გამოცდაზე მთლიანობაში აჭარაში 3 350-მდე მასწავლებელია დარეგისტრირებული.
დღეს გამოცდაზე დარეგისტრირებულ 108 პედაგოგი არ გამოცხადდა – დარეგისტრირებული 777 მასწავლებლიდან გამოცდას 669 პედაგოგი აბარებს.
2019 წლის შემოდგომაზე ორგანიზებული საგნის გამოცდის, საგნობრივი და პროფესიული კომპეტენციების დადასტურების პროცესი პროფესიული უნარების ტესტირებით დაიწყო.
გამოცდა 5 საათს გაგრძელდება.
ეს გამოცდა ძალიან მნიშვნელოვანია პედაგოგებისთვის, რადგან ეს არის გზა სტატუსის ასამაღლებლად. მასწავლებლები, რომლებიც სტატუსის მიღებას ვერ შეძლებენ, სკოლები მხოლოდ დროებით ხელშეკრულებას გაუფორმებენ, ხოლო მათ ადგილებზე ვაკანსიას გამოაცხადებენ.
აჭარის განათლების სამინისტროს ინფორმაციით, გამოცდები ტექნიკურად გამართულ და მშვიდ გარემოში მიმდინარეობს.
გამოცდების ეროვნული ცენტრის ინფორმაციით, ქვეყნის მასშტაბით, გამოცდაზე დარეგისტრირებული მასწავლებლების 80 პროცენტი გამოცხადდა.
გამოცდები ხვალაც გაგრძელდება.
მთავარი ფოტო: აჭარის განათლების სამინისტრო
