ყველაზე მეტი ვაკანსია მათემატიკის მასწავლებლის ადგილზეა გამოცხადებული


განათლების სამინისტროს ინფორმაციით, საჯარო და კერძო სკოლებში საქართველოს მასშტაბით ამ დროისთვის, სულ 100-ზე მეტი ვაკანსიაა გამოცხადებული.

ყველაზე მეტი, – 16 ვაკანსია, მათემატიკის მასწავლებლის ადგილზეა  გამოცხადებული, შემდეგ კი, ბიოლოგიაზე, სადაც 11 ვაკანსიაა გამოცხადებული.

10-10 ვაკანსია გამოცხადებული ფიზიკის, ისტორიის და მუსიკის მასწავლებლის პოზიციაზე.

ვაკანსიების შესახებ ინფორმაცია პედაგოგებს  და მასწავლებლობის მაძიებლებს შეუძლიათ ვებგვერდზე Teacherjobs.ge.

განათლების სამინისტროს ინფორმაციით, კვალიფიციური კადრების დეფიციტი ყველაზე მეტად მცირეკონტინგენტიან სკოლებშია. დღეს ქვეყანაში არსებობს სკოლები, სადაც 1-იდან ასამდე მოსწავლე სწავლობს და ასეთი 900-ზე მეტი სკოლაა ქვეყანაში.

განალების სამინისტროში აცხადებენ, რომ პროგრამამ „ასწავლე საქართველოსთვის“, გარკვეულ სკოლებში პროფესიონალი მასწავლებლების დეფიციტი მეტ-ნაკლებად აღმოფხვრა, თუმცა მთლიანობაში ეს პრობლემა მაინც გამოწვევად რჩება. „რადგან „ასწავლე საქართველოსთვის“ პროგრამა, მოთხოვნილი მასწავლებლების მხოლოდ 40 პროცენტს აკმაყოფილებს ყოველწლიურად“-ნათქვამია სამინისტროს განცხადებაში.

სამინისტროს ინფორმაციით, მასწავლებელთა მომზადების საუნივერსიტეტო პროგრამებზე „ათწლეულებია არ იქმნება კონკურსი და ე.წ უფასო პროგრამებზეც კი კონტინგენტი არ სცდება ყოველწლიურად 530-მდე ადამიანს ბოლო პერიოდში პედაგოგის პროფესიის პრესტიჟის ზრდის მიუხედავად“.

სამინისტროს განმარტებით, უნივერსიტეტები აკადემიური პროგრამების ხანგრძლივობიდან გამომდინარე,  უახლოესი 5-10 წლის მანძილზე ვერ უზრუნველყოფენ საჭირო კადრების მომზადებას.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com