დღეს, 25 ოქტომბერს, ბათუმის პორტში ნატოს მუდმივმოქმედი მეორე ნაღმსაწინააღმდეგო შენაერთის (SNMCMG2) ორი ხომალდი – ITS VESUVIO (იტალია) და TCG AMASRA (თურქეთი) შემოვიდა.
სამხედრო ეკიპაჟს ბათუმის პორტში დახვდა ქალაქის მერი ლაშა კომახიძე, თურქეთის გენერალური კონსული – მაქბულე ქოჩაკი, აჭარის მთავრობის თავმჯდომარე თორნიკე რიჟვაძე და შს სამინისტროს სასაზღვრო პოლიციის უფროსი თემურ კეკელიძე.
ერთობლივი მანევრირება, წყალქვეშა უსაფრთხოების ოპერაციები და აბორდაჟის ტაქტიკური ჯგუფების წვრთნები – ეს არის ის ძირითადი პრაქტიკა, რასაც წვრთნებისას შს სამინისტროს სანაპირო დაცვა გაივლის შავ ზღვაში ნატოს მუდმივმოქმედ მეორე ნაღმსაწინააღმდეგო შენაერთთან (SNMCMG2) ერთად.
ნატოს შენაერთს კაპიტანი ალესანდრო ფალკონე ხელმძღვანელობს.
ნატოს მუდმივმოქმედი მეორე ნაღმსაწინააღმდეგო შენაერთის (SNMCMG2) კაპიტანი ალესანდრო ფალკონე ბათუმში
შავი ზღვის უსაფრთხოებისთვის პრაქტიკულ თანამშრომლობაზე ნატო და საქართველო ბრიუსელის სამიტზე შეთანხმდნენ. როგორც სასაზღვრო პოლიციის უფროსი, თემურ კეკელიძე ამბობს, ნატოს ხომალდების ვიზიტიც სწორედ ამ შეთანხმების ფარგლებში ხორციელდება და მხარეებმა პრაქტიკული ინიციატივები უნდა შეიმუშავონ წვრთნებისას.
„ეს ვიზიტი არის კიდევ ერთი დადასტურება ნატო-საქართველოს თანამშრომლობისა, პირველად იმართება სამი დღის განმავლობაში ნატოსა და სასაზღვრო პოლიციის სანაპირო დაცვის ერთობლივი წვრთნები. ასეთი შეხვედრები ხელს უწყობს ნატოში ინტეგრაციის პროცესს და მნიშვნელოვანია, რომ ამ პროცესში აქტიურად მონაწილეობს შს სამინისტროს სასაზღვრო პოლიცია” – განაცხადა ჟურნალისტებთან საუბრისას თემურ კეკელიძემ.
ნატოს მუდმივმოქმედი მეორე ნაღმსაწინააღმდეგო შენაერთის ხომალდი ITS VESUVIO (იტალია)
ჟურნალისტის კითხვას, თუ რატომ არ ესწრებოდა არავინ შეხვედრას თავდაცვის სამინისტროდან, სასაზღვრო პოლიციის უფროსმა არ უპასუხა. ამავე კითხვაზე კი ლაშა კომახიძემ „ბათუმელებთან” განაცხადა, რომ ეკიპაჟებთან შეხვედრები პროტოკოლითაა გაწერილი და ამ კითხვაზე ზუსტად ვერ გვიპასუხებს.
ამავე თემაზე:
