მასწავლებლის ეროვნულ სკოლაში 5 ათასამდე მსურველი დარეგისტრირდა


მასწავლებლის პროფესიული განვითარების ეროვნული ცენტრის ინფორმაციით, „მასწავლებლის ეროვნული სკოლის“ ფარგლებში დაგეგმილ, პროფესიული გადამზადების სპეციალურ პროგრამაში, 5000-მდე მაძიებელი და პრაქტიკოსი მასწავლებელი დარეგისტრირდა. დარეგისტრირებულ მასწავლებლებთან გასაუბრება  25 ოქტომბერს დაიწყება.

პროგრამის მიზანია გადამზადებული პედაგოგები დასაქმდნენ იმ საჯარო სკოლებში, სადაც კვალიფიციური კადრების ნაკლებობაა.

მასწავლებლებს მომიჯნავე საგნებშიც გადაამზადებენ, რაც მათ შესაძლებლობას მისცემს, სკოლაში ორი ან მეტი საგანი ასწავლონ.

როგორც ცენტრში „ბათუმელებს“ უთხრეს, ტრენინგების დაწყების წინ, მაძიებლებთან და პრაქტიკოს პედაგოგებთან ხელშეკრულება გაფორმდება, სადაც პირობები გაიწერება.

ცენტრის განმარტებით, პროგრამის საჭიროება პროფესიიდან პენსიონერი პედაგოგების გასვლამ გააჩინა. სახელმწიფომ პენსიონერ პრაქტიკოს პედაგოგებს პროფესიიდან გასვლის სანაცვლოდ, ფულადი ჯილდო შესთავაზა. პროფესიიდან გასვლის სურვილი კი 11 ათასამდე პედაგოგმა გამოთქვა. შედეგად სკოლებში ვაკანსიები გაჩნდა.

კონკურსების შედეგად სკოლებმა არსებული ვაკანსიები შეავსეს, თუმცა ჯერ კიდევ არის სკოლები, სადაც კვალიფიციური კადრები არ ჰყავთ. პროგრამა სწორედ ასეთი სკოლების დახმარებას ითვალისწინებს.

ამავე თემაზე:

შეძლებენ თუ არა მასწავლებლები ერთზე მეტი საგნის სწავლებას – სამინისტროს ახალი პროგრამა

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com