ეროვნული ჯილდოს ათეულის მასწავლებლებმა ჰამიდ სადიხლის მხარდასაჭერი განცხადება გაავრცელეს


მასწავლებლის ეროვნული ჯილდოს ათეულის კლუბის წევრი პედაგოგები, გეოგრაფიის მასწავლებლის ჰამიდ სადიგის მხარდასაჭერ განცხადებას ავრცელებენ.

„მიგვაჩნია, რომ ადრეული ქორწინების, ბავშვთა შრომისა თუ მათზე ძალადობის სხვა ფორმების გამოვლენასა და აღმოფხვრაში მასწავლებლის როლი უმნიშვნელოვანესია. სწორედ ისინი არიან ვალდებული, ამ ტიპის შემთხვევებზე გამოხატონ თავიანთი აზრი და იმოქმედონ კიდეც.

მივმართავთ საქართველოს განათლების, მეცნიერების, კულტურისა და სპორტის სამინისტროს, შესაბამის სამართალდამცავ ორგანოებს, საქართველოს სახალხო დამცველს და ყველა პასუხისმგებელ უწყებას, რომ გამოიჩინონ განსაკუთრებული ყურადღება და გატაცების ფაქტთან ერთად გამოიძიონ მასწავლებლის ღირსების შელახვის, გამოხატვის თავისუფლების შეზღუდვის, ვიდეოს გადაღებისა და გავრცელების ფაქტებიც და მიიღონ შესაბამისი სამართლებრივი ზომები.

უნდა გვახსოვდეს, რომ მასწავლებლებისადმი შეურაცხმყოფელი დამოკიდებულება საზიანოა არა მარტო კონკრეტული სკოლის, მისი მოსწავლეებისა და თემისათვის, არამედ მთლიანად ქვეყნის განვითარებისა და დემოკრატიული საზოგადოების ჩამოყალიბებისათვის,“ – ნათქვამია განცხადებაში.

გარდაბნის მუნიციპალიტეტის სოფელ თაზაქენდის სკოლის გეოგრაფიის მასწავლებელმა ჰამიდ სადიგმა ფეისბუქზე ნაადრევი ქორწინება გააპროტესტა და ერთ-ერთი მოსწავლე გოგოს, ქორწინების მიზნით მოტაცების ფაქტი გაასაჯაროვა. გოგო უმაღლეს სასწავლებელში ჩაბარებას აპირებდა.

გატაცებული გოგო ოჯახში დააბრუნეს, განაწყენებულმა ადილობრივმა მოსახლეობამ კი მასწავლებელს შეურაცხყოფა მიაყენა და ბოდიში მოახდევინა, ამის ამსახველი კადრები კი სოციალური ქსელით გაავრცელეს.

მასწავლებლის მიმართ იძულების ფაქტზე უწყებაში გამოძიება სქართველოს სისხლის სამართლის კოდექსის 150-ე მუხლით დაიწყო.

19 წლის გოგოს  თავისუფლების უკანონოდ აღკვეთის ბრალდებით პოლიციამ ორი ადამიანი დააკავა. დანაშაული 7-დან 10 წლამდე ვადით თავისუფლების აღკვეთას ითვალისწინებს.

მარნეულელმა, გარდაბნელმა და თბილისელმა ახალგაზრდებმა ინფორმაციის გასაჯაროების შემდგომ, მასწავლებლის მხარდასაჭერი აქცია სოციალურ ქსელში დაიწყეს, ჰეშთეგი სახელწოდებით – #‎mənhəmidəm – „მეც ჰამიდი ვარ“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com